वीरगंज । वीरगञ्ज महानगरपालिका भित्र सञ्चालित सामुदायिक विद्यालयहरुमा डेस्कबेञ्चको अभाव देखिएको छ । महानगरको शिक्षा समितिले गठन गरेको सामुदायिक विद्यालयको भौतिक अवस्थाको अध्ययन गर्न गठित उप–समितिले स्थलगत निरीक्षणका क्रममा विद्यालयहरुमा बढिमात्रामा डेस्कबेञ्चकै अभाव रहेको देखाएको हो । समितिले सामुदायिक विद्यालयलाई १ हजार ८ सय ७५ सेट डेस्कबेञ्च अभाव रहेको प्रतिवेदनमा उल्लेख गरेको छ । डेस्कबेञ्च अभावमा विद्यार्थी एउटै डेस्कबेञ्चमा कोचिएर बस्नु पर्ने समस्या रहेको तथा केही ठाउँमा भुईँमै बसेर पढ्नु पर्ने बाध्यता रहेको देखिएको हो । २ हप्ता लगाएर स्थलगत निरीक्षण गरेको उपसमितिले निरीक्षणका क्रममा प्राप्त भएको जानकारीलाई प्रतिवेदन बनाएर बिहीबार महानगरपालिकाका मेयर राजेशमान सिंहलाई बुझाएको छ ।

बिहीबार प्रतिवेदन बुझाउँदै उपसमितिका संयोजक प्रदीप केडियाले सामुदायिक विद्यालयको स्तरोन्नतीका लागि प्रतिवेदनमा समेटिएका समस्या सुधार गर्नुपर्नेमा जोड दिएका छन् । वीरगञ्ज महानगरपालिकामा सञ्चालित ९० वटा सामुदायिक विद्यालयमा स्थलगत रुपमा पुगेर समितिले हरेक विद्यालयको अवस्थाको निरीक्षण गरेको थियो । निरीक्षणका क्रममा बजारमा सञ्चालित अधिकांस सामुदायिक विद्यालयमा भवन तथा कक्षाकोठाका साथै डेस्कबेञ्चको अभाव देखिएको समितिकी सदस्य डा.शुष्मा तिवारीले बताइन् । महानगरकै ग्रामिण क्षेत्रका सामुदायिक विद्यालयमा भने कक्षाकोठामा जस्तापाता लगाउनुपर्ने, झ्यालढोका मर्मत गर्नुपर्ने, शौचालय, पिउने पानी, पंखा अभाव जस्ता समस्या भेटिएको उनी बताउँछिन् । समितिले दिएको प्रतिवेदनले ६१ वटा नयाँ कक्षाकोठा निर्माण गर्नुपर्ने, ७१ वटा कक्षाकोठा मर्मत गर्नुपर्ने, २३ सेट शौचालय निर्माण गर्नुपर्ने, ५ सेट शौचालय मर्मत गर्नुपर्ने, ४१९ वटा पंखा जडान गर्नुपर्ने आवश्यकता पनि औँल्याएको छ ।

यस्तै १३२ वटा झ्याल ढोका बनाउनुपर्ने, १३ वटा कोठामा जस्तापाता लगाउनुपर्ने, १९ थान चापाकल जडान गर्नु पर्ने, १४ वटा विद्यालय मैदानमा माटो पुर्नु पर्ने लगायतका समस्या प्रतिवेदनमा देखाइएको छ । वीरगञ्जमै सञ्चालित त्रिजुद्ध मावि, त्रिभुवन हनुमान मावि लगायतमा कक्षाकोठा अभाव देखिएको छ भने माइस्थान विद्यापिठमा डेस्कबेञ्च अभाव भेटिएको छ । प्रतिबेदन बुझ्दै महानगरका मेयर सिंहले सामुदायिक विद्यालय सुधारका लागि समितिले औँल्याएको समस्या समाधानमा दशैँ लगत्तै विस्तृत कार्ययोजना बनाएर अगाडि बढ्ने बताए । यस्तै कतिपय विद्यालयमा शिक्षक नियमित नआउने, आर्थिक अपारदर्शीता, न्यून विद्यार्थी संख्या जस्ता समस्या पनि देखिएकाले त्यसलाई पनि सम्बोधन गर्ने गरी काम गरिने मेयर सिंहले बताए । आफूहरुकाे ध्यान शिक्षा सुधारमै केन्द्रित रहेकाले समितिकाे सुझाव अनुसार याे चाडपर्व वितेलगत्तै काम अघि बढाइने उनले बताए ।