वीरगंज । वीरगन्जको नारायणी अस्पतालमा स्वास्थ्यजन्य फोहोर व्यवस्थापन केन्द्र सन्चालनमा आएको छ । अस्पतालमा बिरामीको उपचारका क्रममा उत्पादन हुने जोखीमयुक्त र जोखीम रहित स्वास्थ्यजन्य वस्तुहरुको वैज्ञानिक व्यवस्थापनका लागि अस्पतालले स्पतालजन्य फोहोर व्यवस्थापन केन्द्र सन्चालनमा ल्याएको हो ।अस्पताल परिसरमै निर्माण गरिएको केन्द्रको बिहीबार औपचारिक उद्घाटन पनि गरिएको छ । बिहीबार उद्घाटनसंगै केन्द्र सन्चालनमा आएको अस्पतालका निमित्त मेसु डाक्टर वीरेन्द्र बहादुर प्रधानले बताए । युएनडिपीको आर्थिक सहयोगमा नारायणी अस्पतालमा स्वास्थ्यजन्य फोहोर व्यवस्थापन केन्द्र निर्माण गरिएको हो । केन्द्र निर्माणका लागि युएनडिपीले ११ करोड ९७ लाख रुपैया आर्थिक सहयोग गरेको निमित्त मेसु प्रधानले जानकारी दिए ।

प्रधानका अनुसार , अस्पतालबाट दैनिक १७० केजी स्वास्थ्यजन्य फोहोर उत्पादन हुदै आएको छ । बिहीबार देखि सन्चालनमा आएको केन्द्रमा जडान गरिएको मेशीनबाट प्रतिघण्टा ५० केजी स्वास्थ्यजन्य फोहोरवस्तु प्रशोधन गर्ने क्षमता रहेको छ । यसअघि अस्पतालमा बिरामीको उपचारका क्रममा निस्कने स्वास्थ्यजन्य फोहोर वस्तु , अस्पताल परिसरकै खाली जग्गमा अव्यवस्थित रुपमा फालिने गरिएको थियो । जोखीम र प्रदुषणयुक्त ती फोहोर वस्तुका कारण अनेक किसिमका समस्या हुने गरेको थियो । तर अब केन्द्र सन्चालनमा आएपछि भने स्वास्थ्यजन्य फोहोरको वैज्ञानिक ढंगले व्यवस्थापन गर्न थालिएको र यसले अस्पताल र आसपासका क्षेत्रमा वातावरणीय प्रदुषण पनि नहुने अस्पतालका प्रवक्ता डाक्टर उदय नारायण सिंहले बताए । केन्द्रमा स्वास्थ्यजन्य फोहोर वस्तु प्रशोधन गरेर ठोस फोहोरहरु बिक्री गर्दा अस्पतालको आन्तरिक आम्दानी पनि बढ्ने भएको सिंहले बताए । उनले भने ,‘ प्रशोधित फोहोर मध्ये नष्ट गर्नु पर्ने फोहोर महानगरपालिकाको ल्याण्डफिल साइटमा पठाउछौ , पुन प्रयोग गर्न मिल्ने (प्लाष्टिक जन्य वस्तु) ठोस फोहोर भने हामी आफै बिक्री गर्छौ , त्यसको आम्दानीबाट तीन चार जना कर्मचारीलाइ तलब पनि खुवाउन सक्छौ ।

सिंहले भने ,‘ अहिले सम्म अस्पतालका लागि ठूलो चुनौत भनेकै अस्पतालबाट निस्किने स्वास्थ्यजन्य फोहोरको व्यवस्थापन नै थियो तर अब त्यहि फोहोरलाइ बेचेर हामी मोहोर कमाउछौ । बिहीबार देखि सन्चालनमा ल्याइएको स्वास्थ्यजन्य फोहोर व्यवस्थापन केन्द्रको उद्घाटन युएनडिपी नेपालका क्षेत्रीय निर्देशक बर्नाडो कोको ले गरेका हुन् । अस्पतालका निमित्त मेसु प्रधानको अध्यक्षतामा भएको उद्घाटन कार्यक्रममा स्वास्थ्य मन्त्रालय अन्र्तगतको गुणस्तर मापन तथा नियन्त्रण महाशाखाका निर्देशक डाक्टर मदन कुमार उपाध्याय , अस्पताल विकास समितिका अध्यक्ष पुरेन्द्रकिशोर लाभ , वीरगन्ज महानगरपालिकाका मेयर राजेशमान सिंह , उपमेयर इम्तियाज आलम , प्रमुख प्रशासकीय अधिकृत लक्ष्मी पौडेल , मधेस विश्वविधालयका प्राध्यापक डाक्टर दिपक शाक्य , स्वास्थ्य कार्यालय पर्साका प्रमुख नवलकिशोर साह , नेपाल चिकित्सक संघ नारायणी शाखाका अध्यक्ष डाक्टर मनोज गुप्ता, वीरगन्ज उद्योग वाणिज्य संघका वरिष्ठ उपाध्यक्ष अनिल अग्रवाल , पर्साका प्रहरी उपरिक्षाक रमेश बस्नेत लगायतको पनि उपस्थिती थियो ।