वीरगंज । आसन्न प्रतिनिधि सभा र प्रदेश सभा निर्वाचनमा समानुपातिक बन्दसूचीमा एकलौटी तरिकाले नाम बुझाएको भन्दै नेपाली कांग्रेस शेखर कोइराला समूहले पार्टी केन्द्रीय कार्यालयमा धर्ना दिएको छ। ललितपुरकाे सानेपा स्थित पार्टी कार्यालमा बुधबार दिउँसो १ बजे देखि शेखर समूह धर्नामा बसेकाे हाे। दिउँसाे २ बजे सम्म चल्ने धर्नामा पर्साका नेता कार्यकर्ता पनि सहभागी छन् ।

पर्साबाट काँग्रेसका पूर्ब जिल्ला सभापति राजेन्द्र बहादुर अमात्यकाे नेतृत्वमा सयाैं नेता कार्यकर्ता धर्नामा सहभागि भएका हुन् ।अमात्यसंगै प्रदेशसभा सदस्य राजेश्वर साह तेली, पुर्व क्षेत्रीय सभापित विजय सर्राफ, वीरगन्ज महानगर सभापति मणिन्द्रलाल नेपाली, नगर उपसभापति सन्ताेष गुप्ता , पूर्ब नगर सचिव मनाेहर साह , नेताहरु विजय कर्ण, राेशन लामिछाने लगायतका नेता कार्यकर्ता पर्साबाट धर्नामा सहभागी रहेका हुन् । पार्टी सभापति शेरबहादुर देउवाले पार्टीमा मनोमानी गरेको र बन्दसूचीमा सल्लाह नै नगरी नाम पठाएको संस्थापन इतर समुहको आरोप छ । शेखर समूहले संघदेखि प्रदेशसम्मको सूची सच्याउनुपर्ने माग अघि सारेको छ । आफूहरुले कम्तीमा ४० प्रतिशत हिस्सा पाउनुपर्ने उनीहरुको अडान छ ।

यसअघि मंगलबार कांग्रेस प्रवक्ता डा.प्रकाशशरण महतले पार्टीभित्रको सहमतिबाटै बन्दसूचीमा नाम पठाइएको बताएका थिए । यसैबिच बुधबार बिहान बालुवाटारमा शेखर समूहको माग सम्बोधन गर्न कांग्रेस पदाधिकारीबीच छलफल भएको थियो।छलफलमा पार्टी सभापति देउवाले शेखर समुहलाई सम्मानजनक हिस्सा दिन तयार रहेकाे बताएका थिए।