वीरगंज । नेपालमा महामारीको रुपमा फैलिरहेको डेंगुबाट संक्रमित हुनेहरुको संख्या ११ हजार बढी भएको छ । इपिडिमियोलोजी तथा रोग नियन्त्रण महाशाखाले उपलब्ध गराएको पछिल्लो तथ्यांक अनुसार हाल नेपालमा डेंगीका बिरामीको संख्या ११ हजार ६५ पुगेको छ ।

तीमध्ये सबैभन्दा बढी डेंगी संक्रमित बागमती प्रदेशमा छन् । बागमती प्रदेशमा मात्र ८ हजार ३ सय ९० जनामा डेंगी देखिएको महाशाखाको तथ्यांकमा उल्लेख छ ।बागमतीपछि लुम्बिनी प्रदेशमा १ हजार ४ सय २१ जनामा डेंगी संक्रमण पु्ष्टि भएको छ ।

महाशाखाका अनुसार अहिले नेपालका कुल १० वटा जिल्लामा डेंगीको संक्रमण बढी देखिएको छ । ती जिल्लाहरुमा काठमाडौं, ललितपुर, भक्तपुर, मकवानपुर, रुपन्देही, दाङ, चितवन, धादिङ, काभ्रेपलाञ्चोक तथा तेह्रथुम छन् । डेंगी बढेसंगै स्वास्थ्य तथा जनसंख्या मन्त्रालयले प्रतिकार्यका कामहरु थालिसकेको जनाएको छ ।