बारा । बाराको कलैया उपमहानगरपालिका–८ मा विपन्न दलित परिवारकी १६ वर्षीया किशोरी छिमेकी युवकबाट बलात्कृत भइन् । गत साउन ५ को उक्त घटनाको जाहेरी प्रहरीमा परेपछि आरोपित युवक फरार छन् । त्यसयता युवकको परिवारले तनाव र दबाब दिएको पीडित परिवारले गुनासो गरेका छन् । किशोरी र आरोपित १८ वर्षीय युवक एकै विद्यालयमा अध्ययनरत थिए । किशोरी १० र युवक ११ कक्षामा पढ्छन् । एक पक्षीय रूपमा मन पराएका युवकले किशोरीको घरमा राति पसेर जबर्जस्ती गरेको पीडित पक्षको भनाइ छ । किशोरीले कराएपछि परिवारले थाहा पाएका थिए । त्यसपछि छरछिमेक र जनप्रतिनिधि मिलेर युवकसँगै विवाह गराइदिन पञ्चायती बसेको खुलेको छ ।

उमेर नपुगेकाले अहिले टीकाटालो गरी पछि विवाह गराइदिने जनप्रतिनिधिसहितको रोहबरमा सहमतिसमेत भएको थियो । सहमतिअनुसार किशोरीको अभिभावकले १ लाख नगद र एउटा मोटरसाइकल दाइजो दिनुपर्ने भयो । तर, किशोरीको आमाले नमानेपछि यो घटना प्रहरीसम्म पुगेको हो ।वडाध्यक्ष रञ्जित चौरसियाले उमेर पुगेपछि केटाकेटीको विवाह गर्ने सहमति दिएको स्विकारे । ‘दुवै जना नाबालिग भएकाले विवाह गर्न कर गरेनौं । पछि सहमति भंग भयो । पीडितलाई कानुनी बाटो रोज्न भन्यौं,’ उनले भने । उजुरीपछि प्रहरीले साउन २० मा कलैया अस्पतालमा किशोरीको स्वास्थ्य परीक्षण गरेको छ । उजुरी दर्ता भएको १ महिना बित्न लागे पनि युवक पक्राउ परेका छैनन् ।

किशोरीका बुबाले प्रहरीमा उजुरी दिएपछि पीडक पक्षको परिवारले दिनहुँ गालीगलौज गर्ने गरेको बताए । ‘न्याय खोज्दा घरमा शान्तले खान, बस्न दिएको छैन,’ उनले भने, ‘तनाव दिने र दिनहुँ गालीगलौज गरेको गर्यै छ । विवाहको प्रलोभन दिएर समय कटाए ।’ पीडित किशोरीले पैसाको प्रलोभन दिएर घटना मिलाउन दबाब आइरहेको बताइन् । जिल्ला प्रहरी कार्यालयका प्रमुख प्रहरी उपरीक्षक होबिन्द्र बोगटीले पीडक किशोरलाई पक्राउ गर्न अदालतबाट अनुमति लिएर खोजी भइरहेको बताए । ‘किशोरीको स्वास्थ्य परीक्षण भएर उजुरी दर्ता भइसकेको छ,’ उनले भने, ‘पक्राउ परेपछि थप अनुसन्धान र कारबाही हुन्छ । साभाल : कान्तिपुर