रौतहट । कुमार चन्दन । नेपाल पत्रकार महासंघ रौतहट शाखाको व्यवस्थापनमा स्थापना गरिएको मनोज चौधरी स्मृति पत्रकारिता पुरस्कार २०७९ विशिष्ट कुमार विवेकानन्द मिश्रलाई प्रदान गरिएको छ । रौतहटको गरुडामा आयोजित कार्यक्रममा पूर्व प्रधानमन्त्री तथा नेकपा एसको राष्ट्रिय अध्यक्ष माधवकुमार नेपाल विशिष्ट पत्रकार कुमार विवेकानन्द मिश्रलाई २५ हजार रुपैया र सम्मानपत्रसहितको मनोज चौधरी स्मृति पत्रकारिता पुरस्कार २०७९ प्रदान गर्नुभयो ।

गोरखापत्र राष्ट्रिय दैनिकको नायब कार्यकारी सम्पादक विशिष्ट पत्रकार मिश्र नेपाल पत्रकार महासंघ रौतहट शाखाको दुई कार्यकाल अध्यक्ष रहिसक्नु भएको छ । कार्यक्रममा पूर्व प्रधानमन्त्री नेपालको साथै गरुडा नगरपालिकाको नगर प्रमुख कन्थमनि प्रसाद कलवारसहित पत्रकारिता क्षेत्रको विभिन्न विशिष्ट व्यक्तिहरु मन्तब्य व्यक्त गर्दै पत्रकार मनोजकुमार चौधरीको पत्रकारिता क्षेत्रमा रहेको योगदानको प्रशंसा गर्नु भएको थियो । पत्रकार चौधरी रेडियो मधेस मसला एफएमको स्टेशन म्यानेजर हुनु हुन्थ्यो ।

कार्यक्रममा स्व. चौधरीको पत्नी तथा गरुडा नगरपालिकाको उपप्रमुख पुनमकुमारी चौधरी नेपाल पत्रकार महासंघ रौतहट शाखाको सहयोग आगामी दिनमा पनि गर्ने प्रतिबद्धता व्यक्त गर्नुभयो । कार्यक्रममा पत्रकारिता, समाजसेवा, राजनीति तथा अन्य क्षेत्रबाट जुटेका सैकडो व्यक्तिहरुको सहभागिता थियो । सम्पूर्ण कार्यक्रमको रेडियो मधेस मसला एफएमद्वारा प्रत्यक्ष प्रसारण गरिएको थियो ।