वीरगंज । मधेश प्रदेशका मुख्यमन्त्री लालबाबु राउत गद्दीलाई यसपाली यहाँका जनताले पुनः निर्वाचित गराउने अवस्था देखिदैन । मधेश प्रदेशको राजधानी जनकपुर बनाउने बेलामा मुख्यमन्त्री पद जोगाउनका लागि मौन बस्नु नै उनका लागि पुनः निर्वाचित नहुने मुख्य कारण देखिन सक्नेमा कुनै शंका छैन । आगामी मंसिर ४ गते हुने प्रदेश एवम् प्रतिनिधी सभाको निर्वाचनमा पनि गठबन्धन हुने लगभग पक्कापक्की छ । गठबन्धन भएको अवस्थामा पर्साको क्षेत्र नम्बर १ (क) मा नेकपा माओवादी केन्द्र र एमालेबिच प्रतिस्पर्धा हुने केन्द्रीय स्रोतले जनाएको छ । सो क्षेत्रबाट नेकपा एमालेमा बलियो सम्भावना भएका बिचारी यादव र नेकपा माओवादी केन्द्रका वीरगञ्ज महानगर संयोजक रहबर अन्सारीबिच भिडन्त हुने देखिन्छ ।

त्यस्तै स्रोतका अनुसार १ (ख) मा मुख्यतया जसपा र नेकपा एमालेबिच प्रतिस्पर्धा हुने देखिन्छ । गठबन्धनको तर्फबाट मधेश प्रदेशका मुख्यमन्त्री लालबाबु गद्दी र नेकपा एमालेबाट शम्भु गुप्ताको लडाई हुने आँकलन गरिएको छ । एमालेले सो क्षेत्रबाट प्रदेश सभा सदस्यका लागि सुन्दर प्रसाद कुर्मी, शम्भु गुप्ता, ओमप्रकाश गुप्ता र महबुब अलीको नाम सिफारिस गरेपनि टिकट पाउने बलियो सम्भावना शम्भु गुप्ताकै देखिन्छ । गुप्ता यसअघि पनि उम्मेदवार बनेका कारण र चुनावमा खर्च गर्न सक्ने ल्याकत पनि गुप्तामै भएको हुँदा अरुको तुलनामा उनी नै प्रबल टिकटका दावेदार हुन् भन्दा फरक नपर्ला । जसपाले भने मुख्यमन्त्री राउतको एकल नाम सिफारिस गरेको छ ।

मुख्यमन्त्री राउतदेखि असन्तुष्ट जनताहरुले पनि र कतिपय गठबन्धनभित्रैका नेता एवम् कार्यकर्ताहरुले पनि राउतलाई मत नदिएर गुप्तालाई नै दिन सक्ने यहाँका जनताहरुको मनस्थिती पनि देखिन्छ । ५ वर्षसम्म जनकपुरमुखी भएका मुख्यमन्त्री गद्दीलाई पर्साबासीले पुनः बिश्वास गर्छन् कि नाई त्यो प्रतिक्षाको विषय बन्ला । मुख्यमन्त्री राउतको कार्यकालदेखि पूर्ण रुपमा असन्तुष्ट रहेको लोसपा वीरगञ्ज महानगर समितिका अध्यक्ष ओमप्रकाश सर्राफले उम्मेदवारी दिने घोषणा गरेपनि एमाले र लोसपाबिच चुनावी तालमेल हुने चर्चाले सार्थकता पायो भने गुप्ता नै मुख्यमन्त्रीका प्रमुख प्रतिस्पर्धी मानिन्छन् ।
साभाल : यात्राडेली