वीरगंज । सत्तारुढ गठबन्धन दलले निर्वाचन क्षेत्र र प्रदेश सभा क्षेत्र नै तोकेर सिट बाँडफाँट गर्ने तयारी गरेको छ। मंसिर ४ गतेका लागि तय गरिएको प्रतिनिधि सभा र प्रदेश सभा निर्वाचनका लागि सत्तारुढ पाँच दलीय गठबन्धन सिट बाँडफाँटका लागि लामो समयदेखि छलफलमा जुटे पनि सहमति भने हुन सकेको छैन। बिहीवार प्रधानमन्त्री निवास बालुवाटारमा बसेको दिनभरको छलफलपछि दलहरु क्षेत्र र प्रदेश नै तोकेर अन्तिम टुंगोमा पुग्ने तयारीमा लागेको नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बताए।

माओवादी केन्द्र कर्णाली प्रदेश समितिद्वारा सुर्खेत वीरेन्द्रनगरस्थित सिटीहलमा आज आयोजित पार्टी प्रशिक्षण कार्यक्रमलाई सम्बोधनका लागि सुर्खेत पुगेका प्रचण्डले सुर्खेत विमानस्थलमा पत्रकारहरूसँगको भेटघाटमा गठबन्धनमा क्षेत्र र प्रदेश तोकेरै सिट बाँडफाँटको सहमति नजिक पुगिएको बताए। सिट बाँडबाँटबारे पनि अन्तिम विन्दुमा पुगिसकेको उनको भनाई रह्यो। ‘सिट बाँडफाँटबारे संख्या सहमतिको नजिक पुगिसकेका छौ,’ प्रचण्डले भने, ‘भोलि दिनभर बसेर टुंग्याउने भनेर हामी हिजो उठेका हौं।’

बालुवाटारमा छलफलपछि सरकारका प्रवक्ता तथा सञ्चार मन्त्री ज्ञानेन्द्रबहादुर कार्कीले आइतवारसम्ममा सिट बाँडफाँट टुंगो लाग्ने बताएका थिए। ‘अब दुई दिन दु:ख दिन्न। अब तेस्रो दिन पार्टीभित्र गृहकार्य गरेर बैठक बस्छ र फाइनल निर्णय हुन्छ,’ बैठकपछि मन्त्री कार्कीले बताए। सिट जित्नमात्र नभएर देशको विकासका लागि गठबन्धनको आवश्यकता भएकोले न्यायोचित ढंगले सिट बाँडफाँट हुने कार्कीको भनाई थियो। शीर्ष नेताहरुको बैठकमा सिट बाँडफाँटबारेमा गम्भीर रुपमा छलफल भए पनि कुनै निष्कर्षमा पुग्न नसकिएको जनता समाजवादी पार्टी नेपालका अध्यक्ष उपेन्द्र यादवले बताए। विषयमा बैठकमा निरन्तर छलफल भए पनि सङ्ख्यामै कुरा अड्किएको र छिट्टै निष्कर्षमा पुगिने यादवले विश्वास व्यक्त गरेका छन्। यसअघि बैठकमा नेपाली कांग्रेसले एक सय, नेकपा (माओवादी केन्द्र)ले ६०, नेकपा (एकीकृत समाजवादी)ले ४०, जनता समाजवादी पार्टी नेपालले ३२ र जनमोर्चाले दुई सिटको दाबी गरेका थिए।