वीरगञ्ज । आयात–निर्यात परिमाणका आधारमा मुख्य नाका वीरगञ्जबाट मात्रै एक महीनामा ४३ अर्ब रुपैयाँभन्दा बढी व्यापारघाटा भएको छ । वीरगञ्ज भन्सार कार्यालयका अनुसार चालू आर्थिक वर्ष (आव) २०७९/८० को साउनमा ४३ अर्ब ४३ करोड रुपैयाँबराबरको व्यापारघाटा भएको हो । चालू आवको पहिलो महीनाको व्यापारघाटा गत आव २०७८/७९ को सोही अवधिको तुलनामा ७ प्रतिशत बढी हो । गत आवको साउनमा ४० अर्ब ४० करोड रुपैयाँ व्यापारघाटा थियो । गत महीना अघिल्लो वर्षको सोही महीनाको तुलनामा आयात भने घटेको छ । निकासी व्यापार स्वात्तै घटेकाले व्यापार असन्तुलन बढेको भन्सारको तथ्यांकले देखाएको छ ।

वीरगञ्ज नाकाबाट निकासी हुने वस्तुको अग्रस्थानमा प्रशोधित खानेतेल रहेकोमा केही महीनादेखि यसको निकासी खस्किएको छ । गतवर्ष तेलको निकासीले निर्यातमा केही भरथेग गरे पनि चालू वर्षमा यो सहुलियत बन्द भएको छ । नेपालका तेल उद्योगीले तेस्रो मुलुकबाट अर्धप्रशोधित तेल ल्याएर यहाँ प्रशोधन गरी भारत निकासी गर्दै आएका थिए । भारतले आफ्नो देशमा तेल आयातमा उच्च दरको सीमा शुल्क लगाएकाले नेपालबाट निकासी सम्भव भएको थियो ।

नेपालका उद्योगीले भन्सार सहुलियतमा निकासी गर्दै आएका थिए । पछिल्लो समय भारतले आन्तरिक बजारमा तेलको मूल्य नियन्त्रण गर्न आयातमा सीमा शुल्क शून्यदेखि २ दशमलव ५ प्रतिशतमा झारेपछि नेपालबाट निकासी करीब ठप्पजस्तै भएको छ । गत महीना ४७ अर्ब ८८ करोड रुपैयाँको वस्तु भित्रिँदा ४ अर्ब ४५ करोड रुपैयाँको निकासी भएको देखिन्छ । गत साउनमा पोहोरको तुलनामा आयात ५ प्रतिशत घटेको देखिन्छ । निर्यात ५४ प्रतिशतको खस्किएको छ । गत साउनमा वीरगञ्ज भन्सारबाट हुने कुल व्यापार पनि घटेको छ । वर्ष २०७८/७९ को साउनमा ५९ अर्ब ७९ करोड रुपैयाँको कुल व्यापार भएकोमा गत महीना यो ५२ अर्ब २४ करोडमा झरेको छ ।