वीरगंज । सर्लाहीको चन्द्रनगर गाउँपालिकामा एक मोटरसाइकल वर्कसपमा आगलागी हुँदा अन्दाजी १० लाख मूल्य बराबरको क्षति भएको छ । चन्द्रनगर गाउँपालिका वडा नं. ६ नाढी बजारमा स्थानीय मोहन साहले सञ्चालन गरेको मोहन मोटरसाइकल वर्कसपमा आगलागी हुँदा १० लाख मूल्य बराबरको समान जलेर नष्ट भएको चन्द्रनगरका स्थानीयहरूले जानकारी दिएका छन् ।

आगलागीबाट मोटरसाइकल वर्कसपमा राखिएको एपाचे मोटरसाइकल १ थान, पल्सर मोटरसाइकल १ थान, डिस्कभर मोटरसाइकल बनाउन राखिएको इन्जिन, हावा मेसिन १ थान, मोटरसाइकल धुने वासिङ्ग मेसिन १ थान र पसलमा राखिएको लगभग ३ लाख मूल्य बराबरको टायर, टिउर तथा मोबिलको काटुनहरु जलेर नष्ट भएको स्थानीय शिवनारायण सिंहले बताए।

अज्ञात व्यक्तिहरूको समूह आएर मोटरसाइकल वर्कसपमा पेट्रोल छर्की आगो लगाएको चन्द्रनगरका माओवादी नेता लोकेन्द्र मुखियाले बताए । वर्कसपबाट प्रहरी चौकी नजिक भएपनि आगलागीको घटना हुनु दुःखद भएको मुखियाले बताउनुभयो । घटनाबारे प्रहरी चौकीमा निवेदन दिँदा पनि प्रहरीले कुनै किसिमको चासो नदेखाएको वर्कसप सञ्चालक मोहन साहले बताए ।घटनाबारे प्रहरीले आवश्यक अनुसन्धान गरिरहेको इलाका प्रहरी कार्यालय केशरगंजले जनाएको छ ।