वीरगंज । बीरगन्ज महानगरपालिका वडा नम्बर २० ड्राइपोर्ट सडक देखि गण्डक नहरको राजगमार्गसम्म करिब साढे ६ किलो मिटर सडक कालोपत्रे गरिने भएको छ । साढे २० करोडभन्दा बढीको लागतमा निर्माण हुन लागेको सडकको शनिबार एक कार्यक्रमकाबीच शिलान्यास गरिएको छ ।

पर्साको क्षेत्र नम्बर १ मा पर्ने उक्त सडकको वन तथा वातावरण मन्त्री प्रदीप यादवले शनिबार एक कार्यक्रमकाबीच शिलान्यास गरेका हुन् । हरपतगन्जको ड्राइपोर्ट सडक देखि मनियारी, भवानीपुरको नहर रोड हुदै जगरनाथपुरको ड्राइपोर्ट तथा इटियाही हुदै गण्डक नहरको राजगमार्ग सम्म आइपुग्ने छ । सडक निर्माणको शिलान्याश गर्दै मन्त्री यादवले वर्षौंको पर्खाइ पश्चात यो क्षेत्र सडक सञ्जालसँग जोडिने बताए ।

यस सडक निर्माणले महानगरका ग्रामीण वडाको समृद्धिमा ठूलो टेवा पुग्ने र यहाँका कृषकहरुको उत्पादनले पनि सहज रुपले बजार पाउने उनले विश्वास व्यक्त गरे ।सडक निर्माणको काम निर्धारित समयभित्रै सकाउन सडक डिभिजन कार्यालय र ठेकदार कम्पनिलाई उनले निर्देशन पनि दिए । शिलान्यास कार्यक्रममा वीरगन्ज महानगरपालिकाका मेयर राजेशमान सिंह, प्रदेशसभा सदस्यहरु करिमा बेगम, जन्नत अन्सारी लगायतको पनि सहभागीता रहेको थियो ।