वीरगंज । अन्तर्राष्ट्रिय बजारमा कच्चा तेलको भाउ फेरि बढेको छ । पछिल्ला केही दिनदेखि निरन्तर उकालो लागेको ब्रेन्ट र मुर्बान कच्चा तेलको मूल्य प्रतिब्यारेल १०० डलर नाघेको छ । बिहीबार (साढे १२ बजे) ब्रेन्ट र मुर्बान कच्चा तेलको भाउ प्रतिब्यारेल १०१.५ डलर पुगेको छ । दुई साताअघि यी तेल प्रतिब्यारेल ९३ डलर हाराहारीमा कारोबार भएको थियो ।
त्यस्तै दुई साताअघि ८८ डलरसम्म झरेको डब्लूटीआई तेलको मूल्य बिहीबार (साढे १२ बजे) ९५.१ कायम भएको छ । तेलको मूल्य पुन: उकालो लागेसँगै २०२२ को अन्त्यसम्म ११० डलरभन्दा माथि रहन सक्ने अनुमान गर्न थालिएको छ । ट्रस्ट सेक्युरिटिज इनर्जी रिसर्चका म्यानेजिङ डाइरेक्टर नेल डिंगमनले याहू फाइनान्ससँगको लाइभमा भनेका छन् ‘एकातिर रसियन तेलमा प्रतिबन्ध जारी रहेको छ, अर्कोतिर कम्पनीहरुसँग तेलको वृद्धि क्षमता सीमित छ, जसले गर्दा तेलको मूल्य झर्न मुस्किल छ ।’ साढे २ महिनाअघि ब्रेन्ट तेलको भाउ १३० डलरसम्म पुगेकोमा दुई साताअघिसम्म ओरालो लागेर ९३ डलसम्म झरेको थियो ।
अन्तर्राष्ट्रिय बजारमा कच्चा तेलको मूल्य बढेपछि अब नेपाल आयल निगमलाई पनि भारतबाट इन्धनको मूल्य बढेर आउनेछ । १५–१५ दिनमा भारतको आईओसीले निगमलाई नयाँ मूल्यसूची पठाउने गर्दछ । यसअघि ३ पटकसम्म मूल्य घटेर आउँदा पनि निगमले भने मूल्य घटाएन । पेट्रोलियम पदार्थको मूल्य बढी हुँदा ढुवानी खर्च समेत बढ्न गई भान्सा समेत महँगिन जान्छ । कच्चा तेलको मूल्य घटेमा महँगी नियन्त्रणमा समेत सघाउ पुग्नेछ । कच्चा तेलको मूल्य बढ्नु नेपालको समग्र अर्थव्यवस्थाका लागि समेत नोक्सानी थपिनु हो ।
