वीरगंज । पर्साको पकाहमैनपुर गाउँपालिका वडा नम्बर ३ स्थित श्री रामचरीत्र भगत माद्यामिक विद्यालयका विद्यार्थीहरु आन्दोलनमा उत्रिएका छन् । विद्यालयमा पंखा जडान नगरेको र विद्यालय व्यवस्थापनका लागि तदारुकता नदेखाएको भन्दै आक्रोशित विद्यार्थीहरुले गाउँपालिका कार्यालय घेराउ गरेका हुन् । विद्यालयका कक्षा कोठामा पंखा नहुँदा साँघुरो कोठाभित्र उकुसमुकुस हुने गरी बस्नुपर्ने बाध्यता रहेको विद्यार्थीहरुको भनाई छ । साथै उनीहरुले अत्यधिक गर्मीका कारण विद्यार्थीहरु अर्धचेत अथवा अचेत सम्म हुने गरेको भन्दै यथाशिघ्र सबै कक्षा कोठामा पंखाको व्यवस्थापन गरेर मात्रै पठनपाठन सुचारु गर्नुपर्ने विद्यार्थीले माग गरेका छन् ।
कक्षाकोठामा पटकपटक पंखा जडान गर्न आग्रह गर्दा पनि प्रधानाध्यापक र गाउँपालिका अध्यक्ष सुरेश मेहताले कुनै चासो नदेखाएपछि बाध्य भएर प्रदर्शन गर्नुपरेको कक्षा ९ मा अध्ययनरत एक छात्रले बताए । शिक्षा स्वास्थ्य जस्ता संवेदनशिल क्षेत्रको सुधार र बिकास पालिकाका प्रमुखको प्राथमिकतामा नपर्ने नेकपा एमाले पकाहमैनपुर गाउँपालिका अध्यक्ष अकलेश साहले बताए । विद्यार्थीहरुको पटकपटकको मागलाई पनि बेवास्ता गरेपछि विद्यार्थीहरुले गरेको प्रदर्शन जायज भएको बताउँदै उनले विद्यार्थीहरुको माग सम्बोधनका लागि प्रधानाध्यापक र पालिका प्रमुखको ध्यानाकर्षण पनि गराएका छन् ।
विद्यालय र स्वास्थ्य चौकीहरुको सुधार र बिकासलाई पहिलो प्राथमिकतामा राखेर काम गर्न पनि उनले सरोकारवालालाई आग्रह गरेका छन् । विद्यालयका प्रधानाध्यापक छोटेलाल साहले आफुले चाहेर मात्रै पंखा जडान हुन नसक्ने बताए । गाउँपालिका कार्यालयमा पत्र पठाइसकेको बताउँदै उनले ढिलोचाँडो जडान हुने बिश्वास व्यक्त गरे । पंखा जडानका लागि आफुले भ्याउनेसम्म प्रयास गरेपनि शिक्षा समितिका अध्यक्षसमेत रहेका पालिका अध्यक्ष मेहताले कुनै तदारुकता नदेखाएको प्रधानाध्यापक साहको प्रतिक्रिया छ । वडा नम्बर ३ का वडाअध्यक्ष सञ्जय चौहानले ३ दिनभित्र पंखा जडान हुने प्रतिबद्धता जनाए । यद्यपी अहिले गाउँपालिकामा विद्यार्थी, विद्यालयका प्रधानाध्यापक, वडाअध्यक्ष, पालिका अध्यक्षसहितको छलफल जारी छ । उक्त छलफल सकारात्मक हुने र कक्षाकोठामा पंखा जडान हुने विद्यार्थीहरुको बिश्वास छ । यदि मागको सम्बोधन नभएमा अँझै आन्दोलन चर्काउँदै जाने चेतावनी पनि उनीहरुले दिएका छन् ।
