वीरगंज । वडा प्रहरी कार्यालय श्रीपुरले १८ जना फरार प्रतिवादीलाई पक्राउ गरेको छ । अदालतबाट विभिन्न मुद्दामा फैसला पाएर लामो समयदेखि फरार रहेका १८ जना प्रतिवादीलाई वडा प्रहरी कार्यालय श्रीपुरले विभिन्न स्थानबाट पक्राउ गरेको हो ।

वडा प्रहरी कार्यालय श्रीपुरको विशेष टोलीले विशेष सूचनाको आधारमा कुटपिट सम्बन्धी मुद्दाका ७ जना, जालसाजी सम्बन्धी मुद्दाका ६ जना, काठ चोरी सम्बन्धी मुद्दाका ३ जना र चेक अनादर सम्बन्धी मुद्दाका २ जनालाई पक्राउ गरेको वडा प्रहरी कार्यालय श्रीपुरका प्रमुख प्रहरी निरीक्षक डिल्लीराज सापकोटाले जानकारी दिए । प्रहरी निरीक्षक सापकोटाले यात्रा डेलीलाई उपलब्ध गराएको तथ्यांकअनुसार पक्राउ पर्नेहरुमा वीरगञ्ज महानगरपालिका वडा नम्बर २० निवासी ५० वर्षीय अमनी पैठानीन, सोही ठाउँका ५८ वर्षीय जैतुनेसा पठानीन, ६० वर्षीय बिगा खाँ पैठान, ६४ वर्षीय कासिम महमद खाँ पैठान, ५५ वर्षीय देव बहादुर प्रसाद यादव, ५२ वर्षीय शेषनाथ बरै, ७३ वर्षीय ठग राउत बरै र सोही ठाउँका रामराज प्रसाद चौरसिया रहेका छन् ।

यस्तै वीरगञ्ज महानगरपालिका वडा नम्बर १४ पिपराका ५० वर्षीय पुष्पराज पटेल भन्ने पुष्पराज प्रसाद कुर्मी, ३४ वर्षीय जितेन्द्र प्रसाद कुर्मी, वडा नम्बर २८ बगहीका ७० वर्षीय लक्ष्मण ठाकुर लोहार, ६७ वर्षीय सिताराम ठाकुर लोहार, ६४ वर्षीय शंकर ठाकुर लोहारलाई पनि पक्राउ गरिएको छ । वडा नम्बर २८ बगहीकै ४६ वर्षीय गोपाद प्रसाद सोनार, वडा नम्बर २० हरपतगञ्जका ७० वर्षीय पन्नालाल साह कलवार, सोही ठाउँका ६५ वर्षीय किशोरी साह कलवार र वडा नम्बर २७ उदयपुरघुर्मीका ५० वर्षीय छोटी यादवलाई पक्राउ गरिएको प्रहरी निरीक्षक सापकोटाले जानकारी दिए ।