वीरगंज । वीरगञ्ज कृषि सामग्री कम्पनी लिमिटेड प्रदेस कार्यालय वीरगञ्जको इनरुवामा रहेको गोदाममा कृषकले ताल्चा लगाइदिएका छन् । मल नपाएको भन्दै आइतबार दिउँसो ६ वटा मल बोकेका ट्रक नितन्त्रणमा लिएका कृषकले बेलुका गोदाममै ताल्चा लगाइदिएका हुन् । कृषकले ट्रक नियन्त्रणमा लिएपछि वीरगञ्ज महानगरपालिकाका मेयर राजेशमान सिंहको पहलमा कृषि सामग्री कम्पनी लिमिटेडका पदाधिकारीसँग मलको कोटा बढाउने विषयमा छलफल भए पनि कोटा बढाउन तयार नभएपछि कृषकहरुले गोदाममै ताल्चा लगाइदिएका हुन् ।

वीरगञ्ज महानगरपालिकाले यहाँका कृषकका लागि ८ हजारा मेट्रिकटन मल माग गरेको थियो । तर कृषि सामग्री कम्पनीले २ हजार ७ सय बोरा (१३० मेट्रिकटन) मल मात्रै उपलब्ध गराएको छ । दैनिक वीरगञ्जबाटै लाखौं टन मल अन्य जिल्लामा पठाइरहँदा यहाका कृषक भने मल नपाएर खेति नष्ट हुन लागेकाले आइतबार ट्रक नियन्त्रणमा लिएका थिए । कृषकले नियन्त्रणमा लिएको ट्रक महानगरपालिकाका मेयर सिंहको निर्देशनमा महानगरले आफ्नो नियन्त्रणमा लिएर आदर्शनगरमा रहेको बालमन्दिरको प्राङणमा राखेको छ । महानगरका कृषकलाई पुग्ने मल उपलब्ध नगराएसम्म नियन्त्रणमा लिइएको ट्रक र गोदाममा लगाइएको ताल्चा नखोलिने मेयर सिंहले बताए ।

कृषक समस्यामा परेकाले उनीहरुलाई यथाशक्य चाँडो मल उपलब्ध गराउन पनि प्रदेश कृषि कार्यालयसँग अनुरोध गरेका छन् ।
ट्रक नियन्त्रणमा लिएपछि कृषि सामग्री कम्पनी लिमिटेडका प्रमुख चन्द्रप्रकाश चौलागाईँसहितको टोलीसँग महानगरका मेयर सिंहको कार्यकक्षमा छलफल भएको थियो । छलफलमा २ सय मेट्रिकटन मात्रै कोटा थप गर्न तयार भए पनि महानगरका मेयर सिंहले अहिलेका लागि कम्तिमा ५ सय मेट्रिकटन मल तत्काल उपलब्ध गराउनु पर्ने अडान राखेका थिए । प्रदेश कृषि मन्त्री र कृषि विभागका महानिर्देशकसँग थप छलफल गरेर निर्णय दिने भनेपछि कृषकहरुले गोदाममा ताल्चा लगाउनुका साथै महानगरको नियन्त्रणमा रहेको मल बोकेको ट्रक छाडिएको छैन ।