वीरगंज । लोकतान्त्रिक समाजवादी पार्टी, नेपालका सांसद अनिलकुमार झाले बाढीको कारण देखाएर परराष्ट्रमन्त्री समितिबाट पन्छिन नमिल्ने बताएका छन् ।

बिहीबार सिंहदरबारमा बसेको राज्यका निर्देशक, सिद्धान्त, नीति र दायित्वको कार्यान्वयन, अनुगमन तथा मूल्यांकन समितिको बैठकमा बोल्दै उनले यस्तो बताएका हुन् । उनले बाढी मात्रै कारण हुन नसक्ने भन्दै परराष्ट्रमन्त्री समितिमा नआउनुको रहस्य अरु पनि हुनसक्ने आश व्यक्त गरे । उनले नेपाली सेना, रक्षा मन्त्रालय, परराष्ट्र मन्त्रालयले समितिको बैठकमा आउनुलाई अन्यथा मान्‍नु नहुने बताए ।

समितिको बैठकमा नेपाली काँग्रेसकी सांसद लक्ष्मी परियारले संसदमा जवाफ दिइसकेको भनेर संसदीय समितिको अवहेलना गर्न नमिल्ने बताइन् । उनले संसद्‍मा जवाफ दिइसके पनि समितिको बैठकमा उपस्थिति भएर त्यसबारेमा स्पष्ट पार्न आवश्यक रहेको उल्लेख गरिन् । सरकार र मन्त्रीले समितिका कुरालाई टारेर जान नहुने जिकिर गरिन् । फरक प्रशंगमा सांसद परियारले सप्तकोसी नदीको मोटरेबल पुललाई रिभ्यू गर्ने कुरामा फलोअप हुन नसकेको बताइन् ।