वीरगंज । प्रमुख निर्वाचन आयुक्त दिनेशकुमार थपलियाले सांसदहरूले उमेदवारी दिएपछि स्वतः उनीहरूको पद समाप्त हुने बताएका छन् । सरकारले मंसिर ४ गतेका लागि प्रतिनिधिसभाको निर्वाचनको घोषणा गरेपछि बिहीबार आयोजित पत्रकार सम्मेलनमा उनले उमेदवारी दिएपछि सांसद पद स्वतः जाने बताएका हुन् ।

उनले भने “दसैँलगत्तै उमेदवारी दर्ता गर्नुपर्नेगरी मिति तय गर्नुपर्ने देखिन्छ, मिति पछि भन्नेछौँ । उमेदवारी दिएपछि निजहरूको पद स्वतः सकिएको मानिनुपर्छ भन्ने आयोगको स्पष्ट धारणा छ । यसलाई कानुनसम्मत ढंगले व्याख्या गरेर अगाडि बढाउँछौँ ।”

आयोगले संविधानमा भएको व्यवस्था अनुसार निर्वाचित भएको मितिबाट कार्यकाल सुरु हुने गरी मंसिरको २१ गते पदावधि सकिने भनेर सरकारलाई जानकारी गराएको उनले बताए ।