वीरगंज । संसदीय समितिले नेपाली उद्योगमा कार्यरत विदेशी मजदुरहरू सट्टामा नेपाली मजदुरलाई रोजगारी दिने वातावरण बनाउन सरकारलाई निर्देशन दिएको छ । प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिले नेपालमा रहेका विदेशी कामदारहरूको लगत संकलन गर्न र विदेशीको सट्टा नेपाली मजुरलाई श्रममा लगाउन श्रम विभागलाई निर्देशन दिएको हो ।

सोमवार वैदेशिक रोजगार र श्रम सम्बन्धी समस्याका विषयमा श्रममन्त्रीसँगको छलफलपछि समितिले यस्तो निर्देशन दिएको हो । समिति सभापति विमलप्रसाद श्रीवास्तवले नेपाली उद्योगमा विदेशी कामदारको लगत संकलन गरी विदेशी कामदारको ठाउँमा स्वदेशी कामदार राख्न निर्देशन दिए । उनले कतार, इजरायल तथा दक्षिण कोरियामा रोजगारीको क्षेत्रमा अहिलेसम्म श्रम मन्त्रालयबाट भए, गरेका कार्य प्रगतिको विवरण समितिमा पठाउन मन्त्रालयलाई निर्देशन दिए ।

सभापति श्रीवास्तवले नेपाली उद्योगमा स्वदेशी कामदार राख्ने विषयमा आपसी सहयोगका लागि समिति सदस्यहरूलाई पनि सहभागी गराउन निर्देशन दिए । समितिले उद्योग, श्रम र भौतिक पूर्वाधार मन्त्रालय तथा अन्य निकायहरूसँग समन्वय गरी मजदुरको समस्या समाधान गर्न श्रम मन्त्रालयलाई निर्देशन दिएको छ ।