वीरगंज । चार हजार तीन सय मिटर उचाइमा रहेको लिमीको तुम्लिङमा नयाँ होटल निर्माण भएर सञ्चालनमा आएको छ। लाप्चाबाट मानसरोवर कैलाशको दर्शन गर्ने धार्मिक पर्यटकलाई लक्ष्य गरी होटल निर्माण भएर सञ्चालनमा आएको हो।

हिमालपारिको गाउँ लिमीका स्थानीय कुन्चोक तामाङका अनुसार हालसम्म नेपाली भूमि लाप्चाबाट मानसरोवर कैलाशको दर्शन गर्ने पर्यटकका लागि व्यवस्थित होटल नभएका बेला नयाँ होटल निर्माण गरेर सञ्चालनमा आएको छ। यसअघि पर्यटक लाप्चा जाँदा र फर्कदा तुम्लिङमा रहेका चौरीको गोठसँगैका साना होटलमा बास बस्नुपर्ने बाध्यता थियोे। पर्यटकको यो समस्याबाट मुक्ति दिन तीन महिनामा उक्त होटल निर्माण गरिएको हो। उक्त होटल लिमी एकता तथा सहकारी संस्थाको लगानीमा निर्माण भएर सञ्चालनमा आएको हो। तामाङले पर्यटकका लागि खाना बस्न समस्या नहुने बताए।

उनले दुुई वटा भवनमा होटल सञ्चालन गरिएको जानकारी दिए। डायनिङ रुम भने फेरुवाको पाल लगाएर बनाइएको छ। खानाको परिकार भने स्थानीय फापरको रोटी, सिस्नो, उवाको सातु, मार्सी चामलको भात, चौरीको दूध, दही र महीको व्यवस्था गरिएको छ। उक्त होटल २५ लाख रुपैयाँ लागतमा निर्माण गरिएको हो। लाप्चाबाट मानसरोवर कैलाशको दर्शन गर्ने समय सुुरु भइसकेको छ। आन्तरिक तथा बाह्य पर्यटक ठूलो संख्यामा आउने जानकारी आएको उनले बताए। भदौ ३ गतेबाट सदगुरुको टोली लाप्चा क्षेत्रबाट मानसरोवर कैलाशको दर्शनका लागि आउँदै छ।