वीरगंज । यातायात व्यवस्था कार्यालय वीरगञ्जको लाइसेन्स शाखाले अघिल्लो आर्थिक वर्षभन्दा बितेको आर्थिक वर्षमा ७ करोड बढी राजस्व संकलन गरेको छ । बितेको आर्थिक वर्ष २०७८/७९ मा यो शाखाले १७ करोड १५ लाख ६२ हजार रुपैयाँ राजस्व संकलन गरेको हो । गएको आर्थिक वर्षको चैत महिनामा सबैभन्दा धेरै २ करोड २४ लाख ५४ हजार रुपैयाँ संकलन गरेको यो शाखाले त्यसपछि फागुनमा १ करोड ९१ लाख ४२ हजार, माघमा १ करोड ८० लाख २० हजार रुपैयाँ संकलन गरेको थियो ।

असोजमा सबैभन्दा कम ८४ लाख ४७ हजार रुपैयाँ मात्रै राजस्व संकलन गरेको यो शाखाले आर्थिक वर्षको सुरुको महिना साउनमा भने १ करोड ३२ लाख ४८ हजार संकलन गरेको थियो । कार्यालय प्रमुख सुशील साहका अनुसार आर्थिक वर्षको अन्तिम महिना असारमा भने १ करोड ३७ लाख ६६ हजार रुपैयाँ राजस्व सङ्कलन गरेको थियो । लाइसेन्स नवीकरण शुल्क बापत सबैभन्दा बढी राजस्व संकलन भएको साहले उपलब्ध गराएको तथ्यांकमा उल्लेख छ । लाइसेन्स नवीकरण बापत गएको आर्थिक वर्षमा ९ करोड ४ लाख ७९ हजार रुपैयाँ संकलन भएको छ ।

यस्तै नयाँ लाइसेन्स शुल्कबापत ३ करोड ३० लाख ६४ हजार, नयाँ आवेदन शुल्कबापत २ करोड २४ लाख १७ हजार रुपैयाँ कार्यालयले संकलन गरेको छ । वर्ग थप बापत ९९ लाख ४० हजार, प्रतिलिपि तथा नवीकरण दस्तुरबापत ८९ लाख २१ हजार, दोस्रोपटक वर्ग थप बापत ६१ लाख ९ हजार, प्रतिलिपि दस्तुरबापत ६ लाख ३० हजार गरी १७ करोड १५ लाख ६२ हजार राजस्व सङ्कलन भएको कार्यालय प्रमुख साहले जानकारी दिए । यो कार्यालयले अघिल्लो आर्थिक वर्ष २०७७/७८ मा करीब १० करोड राजस्व सङ्कलन गरेको थियो भने त्योभन्दा अघिल्लो आर्थिक वर्ष २०७६÷७७ मा जम्मा आठ करोड मात्रै राजस्व सङ्कलन गरेको थियो ।