वीरगंज | अमेरिकी राष्ट्रपति जो बाइडेन पद सम्हाले पछिकै पहिलो साउदी अरब भ्रमणका क्रममा सो देशमा छन् । त्यहाँ उनले देशका युवराज मोहम्मद बिन सलमानलाई भेटेका छन् । भेटमा बाइडेनले सन् २०१८ मा भएको पत्रकार जमाल खशोग्गीको हत्याको विषय उठाए । ‘मैले युवराजसँगको भेटवार्तामा जमाल खशोग्गीको हत्याको मुद्दा उठाएँ । यसमा मेरो विचार के छ त्यसमा छलफल गर्न जरुरी थियो । मैले क्राउन प्रिन्स मोहम्मद बिन सलमानलाई भने कि खशोग्गीको हत्याको लागि तपाईं जिम्मेवार हुनुहुन्छ ।’
भेटमा बाइडेनले मानवअधिकार र राजनीतिक सुधारका विषयमा पनि छलफल गरेका थिए । बाइडेनको भनाइमा युवराजले ‘पत्रकार जमाल खशोग्गीको हत्यामा म व्यक्तिगत रूपमा जिम्मेवार छैन । यो हत्यामा संलग्नलाई कारबाही गर्छौं’ भनेको बताइएको छ । तथापि सीएनएनले उसको स्रोतलाई उल्लेख गर्दै बाइडेनले खशोग्गीको हत्याको कुरा उठाएपछि वार्ता तनावपूर्ण बनेको लेखेको छ ।
गत वर्ष सार्वजनिक एक अमेरिकी रिपोर्टले साउदी युवराज मोहम्मद बिन सलमानले वाशिङ्टन पोस्टका पत्रकार जमाल खशोग्गीको हत्या गर्ने योजनालाई युवराले व्यक्तिगत रुपमा स्वीकृति दिएको दाबी गरेको थियो । ट्रम्प सत्तामा रहँदा साउदी राजकुमारसँग उनको घनिष्ठ सम्बन्ध थियो । यही कारणले खशोग्गीको हत्यासँग सम्बन्धित अमेरिकी गुप्तचर रिपोर्टहरू उनले सार्वजनिक गरेनन् ।
बाइडेन राष्ट्रपति बने र मानवअधिकारका मुद्दामा अडिग बाइडेनले सो प्रतिवेदन जारी गरिदिए । यस गुप्तचर रिपोर्टमा खशोग्गीको हत्यामा युवराज सलमान प्रत्यक्ष रूपमा संलग्न रहेको दावी गरिएको छ । वासिङ्टन पोस्टका पत्रकार जमाल खगोसीको टर्कीको इस्तानबुलस्थित साउदी अरबको वाणिज्य दूतावासमा जाँदा २ अक्टोबर २०१८ मा हत्या भएको थियो ।
अमेरिका–साउदी सम्बन्ध बिग्रन सक्छ
खशोग्गी हत्या प्रकरणमा बाइडेन प्रशासनले युवराज सलमानलाई दोषी ठहर गरेमा मध्य–पूर्वको सबैभन्दा शक्तिशाली र धनी राष्ट्रसँग अमेरिकाको सम्बन्ध बिग्रिने सम्भावना रहन्छ । खसोग्गीको हत्यामा युवराजको संलग्नता देखिने रिपोर्ट आएकाले बाइडेनले पद सम्हालेको यति लामो समयसम्म आफ्नो पुरानो साझेदार मुलुकको भ्रमण गरेनन् । जबकि उनका पूर्ववर्ती ट्रम्पले पहिलो विदेश भ्रमण साउदी अरबबाट सुरु गरेका थिए ।
बाइडेनको अहिलेको भ्रमण खासमा खशोग्गीको हत्यापछि चिसिएको दुई देशको सम्बन्धलाई सुचारु गर्ने प्रयासको रुपमा हेरिएको छ । युक्रेनमाथि रुसको आक्रमणपछि विश्व बजारमा तेलको मूल्य बढेसँगै सबै चीजको भाउ बढेसँगै अमेरिकाले साउदी अरबको साथ खोजेको छ ।
