बीरगन्ज । ठाकुरराम बहुमुखी क्याम्पसमा अध्ययनरत विद्यार्थीहरुको परिक्षा केन्द्र अन्यत्र सारिएपछि विद्यार्थीहरुले ठाकुरराममा रडाको मच्चाएका छन् । त्रिभुवन विश्वविधालय परिक्षा नियन्त्रण कार्यालय बल्खले ठाकुरराम बहुमुखी क्याम्पसमा अध्ययन गर्ने विधार्थीहरूको स्नातक तह दोसो वर्षको परिक्षाको परिक्षा केन्द्र बाराको कलैयाको रामराजा क्याम्पस र सर्लाहीको लालबन्दीमा राखेपछि विद्यार्थीले हिजोदेखि क्याम्पसमा रडाको मच्चाएका हुन् ।

विद्यार्थीहरुले परीक्षा नियन्त्रण कार्यालयको सो निर्णयको विरूद्वमा ठाकुरराम क्याम्पसमा तोडफोड तथा आगजनी गरी भौतिक संरचनामा नोक्सानीमा पुर्याउनुको साथै प्राध्यापक तथा कर्मचारी माथि दुर्व्यवहार गरेका छन् । विद्यार्थीहरुले क्याम्पस प्रमुख डा. उमेश चौरसिया विरुद्ध नाराबाजी समेत गरेका छन् । विद्यार्थीहरुले क्याम्पस चिफ राजीनामा दे, प्राइभेट क्याम्पसको रजाई, गैरजिम्मेवारीपन र पैसाको चलखेल चल्दैन भन्दै क्याम्पस प्रमुख विरुद्ध चर्को नाराबाजी गरेका हुन् ।

विद्यार्थी नेता केशव राज मिश्राले कुनै पनि आन्दोलनको जन्म बाध्यताले हुने भन्दै विद्यार्थीको मागलाई क्याम्पस प्रशासनले बेवास्ता गरेका कारण आन्दोलनले उग्ररुप लिएको बताए । साथै, उनले आन्दोलनबाट भएको सम्पूर्ण तोडफोड नोक्सानीको जिम्मेवारी क्याम्पस प्रशासनले लिनुपर्ने र यथाशिघ्र आन्दोलित विद्यार्थीको माग पूरा गर्न सम्बन्धित सरोकारवालासँग आग्रह गरे ।

बीरगन्जमा धेरै कलेज र स्कुलमा परिक्षा केन्द्र राख्न सकिने अवस्था हुँदा हुँदै क्याम्पस प्रमुख, प्रशासन र प्राइभेट क्याम्पसको मिलोमतोमा पैसाको चलखेलमा परिक्षा केन्द्र अन्यत्र सारिएको छ । ठाकुरराम क्रमश व्यवस्थित हुदैं गएर प्राइभेट क्याम्पसमा विद्यार्थी सुक्न थालेपछि आर्थिक चलखेलमा परिक्षा केन्द्र सारिएको नेवि संघ ठाकुरराम इकाई समितिका अध्यक्ष मनोज साहले आरोप लगाए । उनले परिक्षा केन्द्र सारिएपछि विद्यार्थीलाई थप आर्थिक भार पनि थपिएको बताए । मध्यम वर्गका विद्यार्थी पढ्ने क्याम्पसको विद्यार्थीलाई जानी बुझी अन्यत्र परिक्षा केन्द्र सारेर दुख दिने कार्यमा संलग्न क्याम्पस प्रमुखको राजीनामाको समेत माग गरे ।

यता, विद्यार्थीको नाराबाजी र आगजनीको सामाजिक सन्जालमा आलोचना समेत भएको छ । ठाकुरराम क्याम्पसका प्राध्यापक रोशन लामिछानेले आगजनी र तोडफोड गरेर होइन संयमित तथा शान्तिपूर्ण वार्ताबाट समाधान खोज्न विद्यार्थीहरुलाई आग्रह गरेका छन् । परीक्षा केन्द्रको विषयलाई लिएर उग्र नभई परीक्षा मर्यादित बनाएर बीरगन्जमा परिक्षा केन्द्र बनाई परिक्षा सन्चालन गर्ने वातावरण बनाउन आवहान समेत गरेका छन् । यसका लागि सम्पूण सरोकारवालाहरुले बैठक बसी शान्तिपूर्ण छलफल गरी निक्र्यौल निकाल्नुपर्ने धारणा राखे ।

यता, पूर्व विद्यार्थी नेता राकेश यादवले भने आफ्ना अनुभव सुनाउदैं परिक्षा सन्चालनको निर्णय परिक्षा नियन्त्रण कार्यालय बल्खुले गर्ने हो भन्दै नेतृत्वलाई दबाब दिन सल्लाह दिए । क्याम्पसलाई पुर्ण रुपमा जलाए पनि यहाँ गरिएका आन्दोलनबाट समस्याको समाधान ननिस्कने बताए ।