वीरगंज । बीमा समितिले पूँजी बढाउन निर्देशन दिएपछि बीमा कम्पनीहरु धमाधम मर्जरमा जान थालेका छन् । समितिले हकप्रद रोकेर मर्जरबाटै पूँजी बढाउन दबाब दिएपछि बीमा कम्पनीहरु धमाधम मर्जरमा जान थालेका हुन् । बीमा समितिले २०७८ चैत १० गते जीवन तथा निर्जीवन बीमा कम्पनीहरुलाई पूँजी बढाउन निर्देशन दिएको थियो । समितिको निर्देशन अनुसार २०७९ चैत मसान्तसम्ममा जीवन बीमा कम्पनीहरुले न्युनतम ५ अर्ब रुपैयाँ र निर्जीवन बीमा कम्पनीहरुले २ अर्ब ५० करोड रुपैयाँ चुक्ता पूँजी पुर्याउनु पर्नेछ । पूँजी बढाउन समितिले दवाद दिएपछि बीमा कम्पनीहरुबीच एक आपसमा गाभ्नेरगाभिने तथा प्राप्ति सम्बन्धी सम्झौता हुन थालेको हो । समितिले पूँजी बढाउँन निर्देशन दिएको छोटो समयमै १५ वटा बीमा कम्पनीहरुले मर्जरमा जाने सम्झौता गरेका छन् । जसमा ७ वटा जीवन बीमा कम्पनीहरु र ८ वटा निर्जीवन बीमा कम्पनीहरु रहेका छन् ।

जीवन बीमा तर्फ प्राइम लाइफ, गुराँस लाइफ र युनियन लाइफ इन्स्यारेन्सबीच मर्जरमा जाने सम्झौता गरेका छन् । सूर्या लाइफ र ज्योति लाइफ इन्स्योरेन्सबीच पनि मर्जरमा जाने सम्झौता गरेका छन् । यस्तै सानिमा लाइफ र रिलायन्स लाइफ इन्सयोरेन्सबीच पनि मर्जरमा जाने सम्झौता भएको छ । हाल सानिमा लाइफको चुक्ता पुँजी २ अर्ब ८ करोड ४० लाख रूपैयाँ र रिलायन्स लाइफको चुक्ता पुँजी २ अर्ब १० करोड रूपैयाँ रहेको छ । दुई कम्पनीबीच एक बराबर एकको अनुपातमा मर्जर हुने प्रारम्भिक सम्झौता भएको छ । त्यस अनुसार दुइ कम्पनी मर्ज भएर बन्ने कम्पनीको चुक्ता पूँजी ४ अर्ब १८ करोड ४० लाख रुपैयाँ पुग्नेछ । निर्जीवन बीमा तर्फ हिमालयन जनरल इन्स्योरेन्स र एभरेष्ट इन्स्योरेन्सले सबैभन्दा पहिले मर्जरमा जाने सम्झौता गरेका थिए । यि दुई कम्पनीबीच मर्जरसम्बन्धी सम्पुर्ण प्रकृया सकाएर साउन १ गतेदेखि एकिकृत कारोबार थाल्दै छ । दुई कम्पनीबीच मर्जर पश्चात बन्ने हिमालयन एभरेष्ट इन्स्योरेन्सको नामबाट एकिकृत कारोबार हुनेछ । असार २७ गते सोमबार पनि सिद्धार्थ र प्रिमियर इन्स्योरेन्स कम्पनीबीच पनि मर्जरमा जाने सम्झौता भएको छ । हाल सिद्धार्थको चुक्ता पूँजी एक अर्ब २८ करोड ८० लाख रुपैयाँ र प्रिमियरको एक अर्ब २२ करोड ७६ लाख रुपैयाँ रहेको छ । स्रोतका अनुसार दुबै कम्पनीबीच एक बराबर एकको अनुपातमा मर्जरमा जाने प्रारम्भिक सहमति गरेका छन् । त्यस अनुसार दुई कम्पनी मर्ज भएर बन्ने कम्पनीको चुक्ता पूँजी २ अर्ब ५१ करोड ५६ लाख रूपैयाँ पुग्नेछ ।

यसैगरी, सानिमा जनरल इन्स्योरेन्स र जनरल इन्स्योरेन्सबीच पनि एक बराबर एकको अनुपातमा मर्जरमा जाने सम्झौता भएको छ । हाल सानिमा र जनरल इन्स्योरेन्स दुबैको एक÷एक अर्ब रुपैयाँ चुक्ता पूँजी रहेको छ । एक बराबरको एकको अनुपातमा मर्ज भएपश्चात बन्ने कम्पनीको चुक्ता पूँजी २ अर्ब रुपैयाँ पुग्नेछ ।
यसैगरी असार २९ गते बिहिबार विहानै सगरमाथा र लुम्बिनी जनरल इन्स्योरेन्सबीच पनि मर्जरमा जाने सम्झौता गरेका छन् । स्रोतका अनुसार सगरमाथा र लुम्बिनी जनरल इन्स्योरेन्स बीचमा १००ः८० को रेसियोमा मर्जरमा जाने सहमति भएको हो । हाल सगरमाथाको चुक्ता पूँजी १ अर्ब ३३ करोड ३६ लाख रुपैयाँ र लुम्बिनी जनरल इन्स्योरेन्सको चुक्ता पूँजी एक अर्ब ३१ करोड २७ लाख रुपैयाँ रहेको छ । त्यस अनुसार मर्जर पश्चात बन्ने कम्पनीको चुक्ता पूँजी २ अर्ब ४० करोड रुपैयाँ पुग्नेछ । मर्जरमा जोन सम्झौतापत्र हस्ताक्षर गरेका ७ वटा जीवन बीमा कम्पनी र ८ वटा निर्जीवन बीमा गरी १५ वटै बीमा कम्पनीको शेयर कारोबार रोक्का छ । मर्जर तथा एक्वीजिशन प्रयोजनको लागि नेप्सेले १५ वटै कम्पनीको शेयर कारोबार रोक्का गरेको छ ।