वीरगंज । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले दलहरुको आवश्यकता, औचित्य र अपरिहार्यता झनै बढेर गएको बताएका छन्। अध्यक्ष ओलीले दलहरुमाथि घृणाभाव फैलाउने प्रयास भइरहेको भन्दै असन्तुष्टिसमेत व्यक्त गरे। उनले स्थानीय तह निर्वाचनमा उठेका स्वतन्त्र उम्मेदवारप्रति लक्षित गर्दै जान्ने हुनका लागि, ठूलो हुनका लागि पनि राजनीतिक दलहरु र नेताहरुलाई गाली गर्ने प्रवृत्ति आएको भन्दै असन्तुष्टि व्यक्त गरेका हुन्। मानव अधिकार एलाइन्सले बुधबार काठमाडौँमा आयोजना गरेको एक कार्यक्रममा बोल्दै उनले दलीय प्रणालीको औचित्य, आवश्यकता र अपरिहार्यता आज झन बढेर गएको र भोलि पनि कायमै रहने बताए।
मानव अधिकारको रक्षाका लागि दलहरुको संगठित शक्ति अपरिहार्य रहेको पनि ओलीको भनाइ छ। उनले दलहरु भन्दा व्यक्ति निष्पक्ष हुन्छन् भन्ने धारणा सही नभएको पनि स्पष्ट पारे। उनले भने, ‘डमोक्रेटिक सिस्टममा राजनीतिक दलहरुको मुख्य भूमिका हुन्छ। कहिले–कहिले कोही–कोही स्वतन्त्र फाट्टफुट्ट पालिका सालिका वडाहरु छानिनु बेग्लै कुरा हो। तर दलीय प्रणाली, दलहरुको औचित्य, आवश्यक्ता र अपरिहार्यता आजको विश्वले स्वीकारेको चिज हो। अपरिहार्यता स्वीकारेको चिज हो। र, दलहरुको योगदान आज एउटा ट्रेन्ट चलेको छ–अलिकति चलाउन खोजिएको छ संगठित ढंगले नेपालमा। दलहरुको योगदान, इतिहासमा उनीहरुले जुन ढंगले भूमिका खेले, सामाजिक जागरणका लागि जुन भूमिका खेले, जुन बलिदानपूर्ण संघर्ष गरे, अगाडि बढाए समाजलाई। त्यसपछि सम्मान नगर्ने, घृणा भाव फैल्याउने?’
उनले थपे, ‘त्यो प्रवृत्ति अहिले बढाइएको छ। अहिले सबभन्दा जान्ने हुनका लागि, निष्पक्ष हुनका लागि, ठूलो हुनका लागि, अरुभन्दा पृथक हुनका लागि राजनीतिक दल र नेतालाई गाली गर्नुपर्छ। अनि त्यो व्यक्ति चाहिँ अलिकति निष्पक्ष, तटस्थ भन्ने ठानिने खालको स्थितिको एउटा यस्तो इम्प्रेषण दिन खोजिएको छ। त्यो कुरा साँचो होइन। त्यो सही होइन। राजनीतिक दलहरुको भूमिका हिजो पनि थियो, आज पनि छ। र, भोलि पनि रहन्छ।’
