जनकपुरधाम । चुरे तथा वन जंगल संंरक्षण अभियान, केन्द्रिय कार्य समिति जनकपुरधामले जनकपुरधाममा दिउँसै लालटेन बालेर विरोध प्रदर्शन गरेको छ ।

मंगलबार जनकपुरधामको रेल्वे स्टेशनबाट लालटेनसहित महिलाहरुले प्रदेश सरकार र प्रधानमन्त्रीविरुद्ध विभिन्न नारा लगाउँदै जनक चौकसम्म विरोध गरेका हुन । जनकचौकमा कोणसभा गर्दै चुरे तथा वन जंगल संरक्षण अभियानका राष्ट्रिय संयोजक सुनिल कुमार यादवले विगतमा विभिन्न प्रकारको आन्दोलन र सहमति हुँदा पनि माग पुरा नभएको भन्दै सुकुम्वासीको नाउँमा गलत व्यक्तिलाई चुरे तथा वनजंगलको जग्गा दिने काम भइरहेको बताउँदै पुन आन्दोलन थालेको बताए ।

अभियानले हिजो (सोमबार) मुख्यमन्त्री तथा मन्त्रिपरिषदको कार्यालय,जिल्ला प्रशासन कार्यालय धनुषा,उद्योग वाणिज्य संघ जनकपुरधाम र मधेश प्रदेशका सम्पुर्ण पार्टीलाई एकसाथ ध्यानाकषर्णपत्र वुझाएको थियो । अभियानले भोली असार २९ गते (बुधबार) सुकुम्वासी तथा भुमीहिन महिलाहरुले झाडु जुलुस प्रर्दशन गर्ने र ३० गते जनकपुरधाम वन्दको घोषणा गरेको छ ।

चुरे तथा वनजंगल संरक्षण अभियानले प्रदेश सरकार अगाडि राखेको आफ्नो तीन वुंदे माग अन्तरगत मधेश प्रदेश सरकारले चुरे तथा वनजंगल संरक्षण अभियानसंग मिति २०७८ साल भादो ४ गते गरेको सम्झौता अविलम्व सार्वजनिक गरि कार्यान्वयन मा ल्याउनुपर्ने, तराई मधेशका भुमिहिन दलित,भुमिहीन सुकुम्वासी र अव्यवस्थीत वसोबासीहरु भुमि अधिकारबाट वंचित रहेको हुनाले तत्कालि भुमि अधिकार दिनुपर्ने र स्थानिय सरकारद्धारा उठीवास लगाउने कार्य वन्द गर्नुपर्ने तथा वनजंगल र चुरे क्षेत्रको जग्गा सुकुम्वासी आयोगले भुमिहिन दलित,भुमिहिन सुकुम्वासी र अव्यवस्थीत वसोवासीहरुको नाउमा नक्कली भुमिहिन दलित ,नक्कली सुकुम्वासी र अव्यवस्थीत वसोवासीलाई बांडी बनजंगल र चुरेक्षेत्र मास्ने कार्य आयोग र स्थानियतहबाट हुदै आएकोले वनजंगल तथा चुरेक्षेत्रको जग्गा बाडने कार्य अविलम्व वन्द गर्नुपर्ने माग रहेको छ ।