वीरगंज । मधेश प्रदेशस्थित जनकपुरधाममा निःशुल्क लोकसेवा आयोग परीक्षा तयारी कक्षा सम्पन्न भएको छ ।

मुख्यमन्त्री बेटी पढाउ बेटी बचाउ अभियान अन्तरगत जनकपुरधाममा सञ्चालित निःशुल्क लोकसेवा आयोग परीक्षा तयारीमा ६० जना छात्राहरु सहभागी भएका छन् । जेठ १७ गतेदेखि शुरु भएको परीक्षा तयारी कक्षामा ३० जना नायब सुब्बा र ३० जना खरीदारको तयारी गरेको बताइएको छ ।मधेश प्रदेश सरकार शिक्षा विकास निर्देशनालय र जनकपुर स्कील डेभलोपमेन्ट इन्स्टिच्यूट प्रा.लि.को समन्वयमा भएको निःशुल्क लोकसेवा आयोग परीक्षा तयारी कक्षामा सहभागी विद्यार्थीले उच्चस्तरीय र गुणस्तरीय किसिमले अध्ययन गर्न पाएकोमा खुशी व्यक्त गरेका छन् ।

यस आर्थिक वर्षमा मधेश प्रदेश भरमा ४८० जना विद्यार्थी निःशुल्क लोकसेवा आयोगको तयारीमा रहेको जनकपुर स्कील डेभलोपमेन्ट इन्स्टिच्यूटका समित कुमार ठाकुरले बताएका छन् । उनले मधेश प्रदेश सरकारको सम्झौता अनुसार एक महिने लोकसेवा आयोगको तयारी कक्षा थियो, तर विद्यार्थीहरुको चाहना अनुसार अझै १० दिन थपिएको छ । यहाँबाट पढेका विद्यार्थीहरुले परीक्षामा पनि राम्रो अंक ल्याउने गरेको दावी समेत गरेका छन् । विद्यार्थीहरुलाई शशि कुमार यादव, बाल मुकुन्द्र शर्मा, नन्द कुमार भट्टराईले प्रशिक्षण दिएका छन् ।