बिरगंज । दशकौँ यताकै सबैभन्दा डरलाग्दो आर्थिक समस्या भोगिरहेको श्रीलंकाले अत्यावश्यक बाहेकका सवारी साधनहरूलाई पेट्रोल बिक्री बन्द गरेको छ । आगामी दुई साताका लागि स्वास्थ्य सेवा र खाद्यान्न बोक्ने बस, ट्रेनलगायत सवारी साधनलाई मात्र पेट्रोल भर्ने अनुमति दिइएको छ ।
अहिले श्रीलंकाका सहरी क्षेत्रका विद्यालयहरू बन्द छन् । त्यसैगरी सरकारी अधिकारीहरूले मुलुकका दुई करोड बिस लाख बासिन्दालाई घरबाटै आफ्ना काम गर्न आह्वान गरेका छन् । खाद्यान्न र इन्धन जस्ता वस्तु आयात गर्न अर्थ अभावको समस्या भोगिरहेको दक्षिण एसियाली मुलुक श्रीलंका उद्धार सम्झौताका वार्ताहरूमा व्यस्त छ ।
सत्तरीको दशकमा तेल अभावका कारण अमेरिका र युरोपमा इन्धनका लागि रासनको व्यवस्था गरिनुका साथै तेलको माग घटाउन ‘स्पीड लिमिट’ लागू गरिए यता विश्वमा सर्वसाधारणलाई तेल बिक्रीमाथि रोक लगाउने श्रीलंका पहिलो मुलुक भएको इन्भेस्टेकका तेल तथा ग्यास अनुसन्धान प्रमुख नाथन पाइपरले बताएका छन् ।
पाइपरले तेलको मूल्यमा अत्यधिक वृद्धि र श्रीलंकासँग विदेशी सटही जगेडा कम भएका कारण तेल बिक्री वितरणमाथि प्रतिबन्ध लगाउनु परेको बताएका छन् । यस टापु राष्ट्रका अधिकांश जनता इन्धन बिनाको जीवनयापन कसरी सामना गर्ने भन्ने बारे अनभिज्ञ छन् । केही महिनादेखि श्रीलंकाका सम्पूर्ण पेट्रोल पम्पमा तेल लिनेहरूको लामो लाइनहरू देखिन थालेका थिए ।
राजधानी कोलम्बोमा ट्याक्सी चलाउँदै आएका २९ वर्षीय चिन्थाका कुमाराले तेल बिक्री प्रतिबन्धले धेरै मानिसलाई समस्या हुने तथा दिनहुँ मजदुरी गर्ने आफू तेलका लागि तीन दिनदेखि लाइनमा बसिरहेको र अझै कहिले तेल पाउने थाहा नभएको बताउँछन् ।
