वीरगंज | नेपाल धितोपत्र बोर्ड र पुँजी बजार सुधार सङ्घर्ष समितिबिच भएको सहमति कार्यान्वयनको लागि अर्को नयाँ कार्यान्वयन समिति गठन भएको छ | १९ बुँदे माग पुरा गर्ने सहमति भए पछि उक्त सहमतिको कार्यान्वयन गर्न कार्यान्वयन समिति गठन भएको हो | धितोपत्र बोर्डका कायम मुकायम कार्यकारी निर्देशकद्वय विनयदेव आचार्य र मुक्तिनाथ श्रेष्ठ, पुँजी बजार सुधार सङ्घर्ष समितिको तर्फबाट रोहन कार्की र एसपी चौलागाई र नेपाल सरकारबाट मान्यता प्राप्त सङ्घहरूका एक एक जना प्रतिनिधि रहने गरी नयाँ समितिको गठन भएको हो | यो सँगै पहिलेको पुँजी बजार सुधार सङ्घर्ष समिति भने विगठन भएको छ | अनसनको १० औ दिनमा आज तिलक कोइरालाले अनसन तोडेका छन् | उनले अध्यक्ष रमेश हमालको हातबाट जुस पिएर अनसन तोडेका हुन् |
तस्वीरहरु रोहन कार्कीको फेसबुकवाल बाट
यस्ता छन् १९ बुँदे सहमति :
१.अर्थ मन्त्रालयले गठन गरेको मुद्रा तथा पुँजी बजारका समस्या अध्ययन गर्न गठन गरेको अध्ययन समितिको ५८ बुँदे सुझावका बाँकी काम गर्न गराउन पुँजी बजारको समस्या सम्बन्धमा अर्थ मन्त्रालयसँग निकट रहेर कार्य गर्ने ।
२. वाणिज्य बैङ्कका सहायक कम्पनी र अन्य संस्थागत पब्लिक कम्पनीहरूलाई ब्रोकर लाइसेन्स प्रदान गर्ने सम्बन्धमा नेप्सेसँग आवश्यक समन्वय गर्ने ।
३. कमिसन ब्रोकर र फुल ब्रोकर सम्बन्धमा थप अध्ययन गरी कार्य अगाडि बढाइने ।
४. धितोपत्र दलाल व्यवसायीको विगत १५ महिनामा २३ स्थानमा शाखा कार्यालयका लागि पूर्वाधार तयार गर्न सूचित गरेकोमा आठ स्थानमा शाखा कार्यालय स्थापना स्वीकृति गरिएको छ । तथा थप १६ स्थान स्वीकृत दिने प्रक्रिया तत्काल अगाडि बढाइने।
५. गैर आवसीय नेपालीहरूलाई पुँजी बजारमा लगानीको वातावरण तयार गर्न हाललाई विदेशमा काम गर्ने श्रमिकहरूलाई सार्वजनिक निष्कासनमा १० प्रतिशत आरक्षण गर्ने काम अन्तिम चरणमा रहेकोले आगामी २०७९ श्रावण देखि कार्यान्वयनमा आउने ।
६. सार्वजनिक ओहदामा रहेका महानुभावहरूलाई पुँजी बजारको बारेमा सकारात्मक वा नकारात्मक अभिव्यक्ति नदिने सम्बन्धमा बोर्डले सञ्चालन गर्ने वित्तीय साक्षरताको कार्यक्रममा उक्त विषयलाई विशेष जोड दिने र यस सम्बन्धमा बोर्डले समय समयमा विज्ञप्ति जारी गर्ने ।
७. नेप्सेमा रहेको सरकारी स्वामित्व तत्काल विनिवेश गरी रणनीतिक साझेदार ल्याउने र संस्थागत सुदृढीकरण गर्ने सम्बन्धमा नेपाल सरकार, अर्थ मन्त्रालयसँग आवश्यक समन्वय गर्ने ।
८. साना तथा मझौला उद्यमहरूको धितोपत्र कारोबारका लागि एसएमईज प्ल्याटफर्म (SMES Platform) सञ्चालनका लागि नेप्सेले कार्यविधि तयार गरिसकेको र सो सम्बन्धी प्राविधिक व्यवस्था मिलाउने कार्य भइरहेकोले २०७९ भदौ महिना सम्म कार्यान्वयनमा ल्याउनका लागि पहल गर्ने ।
९. धितोपत्र बजारमा लिइने शुल्कका सम्बन्धमा बोर्डबाट अध्ययन सम्पन्न हुने क्रममा रहेकोले सोको प्रतिवेदन प्राप्त भएपश्चात् सबै सरोकारवालाहरूको उचित राय सुझाव लिई अन्तिम रूप दिने ।
१०. दीर्घकालीन लगानीकर्ताका लागि ३ प्रतिशत मात्र पुँजीगत लाभकर लाग्ने सम्बन्धमा नेपाल सरकार, अर्थ मन्त्रालयसँग आवश्यक समन्वय गर्ने ।
११. मागको बूँदा ११ को सम्बन्धमा धितोपत्र कारोबार सञ्चालन विनियमावली, २०७५ कार्यान्वयन पश्चात टिएमएस सञ्चालन गर्दा प्राविधिक रुपमा सम्भाव्य भएमा उक्त व्यवस्था समेट्ने सम्बन्धमा आवश्यक कार्य अगाडि बढाइने छ।
१२. मागको बूँदा १२ को सम्बन्धमा नेपाल सरकार, अर्थ मन्त्रालयसँग समन्वय गर्ने ।
१३. धितोपत्र बजारमा नयाँ औजार भित्रयाउने सम्बन्धमा नेपाल स्टक एक्सचेञ्ज लि. बाट अध्ययन भई कार्यान्वयनको चरणमा रहेकोले सोको लागि आवश्यक कार्य अगाडि बढाइने ।
१४. मागको बँदा १४ सम्बन्धमा नेपाल सरकार, अर्थ मन्त्रालय, नेपाल राष्ट्र बैंक र बीमा समितिसँग आवश्यक समन्वय गर्ने ।
१५. मागको बूँदा १५ सम्बन्धमा नेपाल राष्ट्र बैंकसँग आवश्यक समन्वय गर्ने ।
१६. मागको बूँदा १६ सम्बन्धमा आवश्यक अध्ययन गरी कार्य अगाडि बढाइने ।
१७. मर्जर तथा एक्विजिसन सम्बन्धमा रहेको अन्यौलता हटाउन नेपाल राष्ट बैंक, बीमा समिति र नेप्से सम्मलित समिति गठन भइसकेको र उक्त समितिबाट प्राप्त हुने प्रतिवेदन बमोजिम कार्य तत्तकाल कार्य अगाडि बढाइने।
१८. मागको बूँदा १८ को सम्बन्धमा नेपाल राष्ट्र बैंकसंग समन्वय गर्ने ।
१९. मागको बुँदा नं. १९ को सम्बन्धमा पुँजी बजार र शयर मूल्य को सम्बन्धमा पुँजी बजार र शेयर मूल्यलाई प्रभाव पार्ने सम्बन्धी नीति नियम लागू गर्दा लगानीकर्ताले पूर्व तयारी गर्न सक्ने गरी आवश्यक समय प्रदान गर्ने ।