दाङ- घरमा बुवा बिरामी। उपचार गर्ने पैसा भएन। सधै‍ँ पैसाको अभाव भइरहने। खर्च जुटाउन धौधौ पर्‍याे। बिरामी बुवाको उपचार गर्न चाहिने पैसाको जोहो गर्न पाँच वर्षअघि विदेश उडेका मनोजकुमार चौधरीको विदेशमा मृत्यु हुन पुग्यो। राजपुर गाउँपालिका वडा नं. ४ दुलैया गाउँ उनै मनोजकुमारको शवको प्रतीक्षामा छ। तर, अझै शव ल्याउने चाँजोपाँजो मिलेको छैन। छोराको शव कुरेर बसेकी आमा रामली चौधरीको आँखा ओभाएका छैनन्। बुढेसकालको सहारा ठानेको छोराको विदेशी भूमिमा मृत्यु हुन पुग्दा आमाको सपना टुक्रिएकाे छ। कहिले टोलाउने त कहिले आँखाबाट टिलपिल आँशु झार्नु सिवाय अरू केही छैन।

‘छोराले बुवाको उपचार गर्छु भनेर विदेश उड्यो। छोरा उडेको केही महिनामा उहाँको मृत्यु भयो’, रामलीले भनिन्, ‘न उसको बुवा बाँच्नु भयो, न छोरा नै रह्यो।’ दुबईमा सेल्स मेनको रूपमा काम गर्ने मनोजकुमार मोटरसाइकल दुर्घटनामा परेर घाइते भएका थिए। कारसँगको ठक्कर खाँदा मनोजकुमार गम्भीर घाइते भएपछि दुबईको स्थानीय अस्पतालमा उपचार भइरहेको थियो। जुन ८ मा उनकाे दुर्घटना भएको थियो । घाइते अवस्थामा उपचार गराइरहेका मनोजको तीन दिनअघि मृत्युको खबर घरसम्म आइपुगेको हो। मनोजकुमारको परिवार, आफन्त, छिमेकीसहित सिंगो गाउँ शोकमा छ।

‘यो दुःखद खबरले हामीलाई दिन न दिन जस्तो छ, रात न रात जस्तो छ। भोक प्यास सबै भुलेका छौँ’, दाइ नाता पर्ने दिनेशकुमार चौधरीले भने, ‘हामीले सबै सोधीखोजी गरेका छौँ। शव ल्याउन ढिलो हुनेजस्तो भयो। हाम्रो पीडामा मलहम लगाउनको लागि चाँडै शव नेपाल ल्याइदिनुपर्‍याे।’ स्थानीय स्तरबाट शव ल्याउन पहल भइरहे पनि सुनुवाइ भएको छैन। शव अस्पतालमा भएकाले ल्याउन सजिलोको लागि सरोकारवाला निकायले ध्यान दिन आग्रह गरे। ‘हामी हाम्रो संस्कारअनुसार अन्तिम संस्कार गर्न चाहन्छौँ’, उनले भने, ‘यहाँ घरमा परिवारका सदस्यलाई सम्झाउन गाह्रो परिरहेको छ।’

दुबईको आबुधबी सिटीमा दुर्घटना भएको थियो। त्यहाँ रहेका नेपालीले उपचारको लागि सहयोग गरेका थिए। ठक्कर दिने कार चालकमाथि मुद्धा अघि बढेको छ। तर, शव कसरी ल्याउने भन्ने बारेमा परिवारका सदस्य अन्यौलमा छन्।शव ल्याउने विषयमा माथिल्लो तहमा समेत पहल भएको पत्रकार महेश रिजालले बताए। तर, कहिले शव आउछ भन्नेमा टुंगो लागिसकेको छैन।‘रोजगारीको लागि विदेश गएको बेला दुर्घटनामा परेर मृत्यु भयो। अहिले शव ल्याउन गाह्रो परेको छ’, उनले भने, ‘हामी चाहन्छौँ दुई देशबीचमा समन्वय गरेर चाँडोभन्दा चाँडो शव ल्याउने विषयमा सरकारले ध्यान दिनुपर्‍याे।’