वीरगंज । भारतीय राजदूतावासले नेपालका प्रधानमन्त्री शेरबहादुर देउवाको उपस्थितिमा आज आठौँ अन्तर्राष्ट्रिय योग दिवस मनाएकाे छ। कार्यक्रममा भारत सरकारको आयुष मन्त्रालयद्वारा स्वीकृत व्याख्यानसहितको साधारण योग विधि प्रस्तुत गरिएकाे थियाे। योगमा अभिरुचि भएका करिब ६ सयजना उक्त योग सत्रमा सहभागी थिए।
दिवसकाे अवसरमा बोल्दै प्रधानमन्त्री देउवाले योग अभ्यासले शरीर र दिमाग दुवैलाई सकारात्मक ऊर्जा दिने र योगलाई दैनिक जीवनको एक हिस्सा बनाउनुपर्ने उल्लेख गरे। कार्यक्रमका विशिष्ट अतिथि सञ्चार तथा सूचना प्रविधिमन्त्री ज्ञानेन्द्रबहादर कार्कीले सबैलाई नियमित योग गर्न प्रेरित गरे।
दूतावासका कार्यवाहक राजदूत श्रीमती नामग्य सी खम्पाले आफ्नो स्वागत मन्तव्यका क्रममा योगको प्राचीन परम्परा दुई देशको साझा सभ्यता सम्पदा रहेको चर्चा गर्दै यसलाई सम्पूर्ण मानव जातिको कल्याणका लागि विस्तार गर्नुपर्नेमा जोड दिइन्। सन् २०१४ मा संयुक्त राष्ट्र संघ महासभामा १७७ सदस्य राष्ट्रले भारतको प्रस्ताव समर्थन गरेपश्चात सन् २०१५ यता हरेक वर्ष जुन २१ मा अन्तर्राष्ट्रिय योग दिवस मनाइँदै आइएकाे छ।
