वीरगंज । चालु आर्थिक वर्षको जेठ महिनामा गत आर्थिक वर्षको जेठ महिनाभन्दा तेब्बरले पेट्रोलको आयात बढेको छ। वीरगञ्ज भन्सार कार्यालयले जारी गरेको तथ्यांकमा चालु वर्षको जेठमा यस नाका भएर चार अर्ब ७३ करोड ५३ लाख ६६ हजार बराबरको कुल ३६ हजार ७ सय ४३ किलोलिटर पेट्रोल आयात भएको छ। गत आर्थिक वर्षमा भने वीरगञ्ज नाका भएर जेठमा ८७ करोड ३८ लाख ३३ हजार बराबरको १२ हजार ९ सय ४० किलोलिटर मात्रै पेट्रोल आयात भएको थियो।

यस आँकडाअनुसार चालु वर्षको जेठमा गत आर्थिक वर्षको भन्दा करिब तीन गुणाले पेट्रोलको आयात बढेको हो। अहिले नेपालमा पटक–पटक पेट्रोलियम पदार्थको मूल्य निरन्तर वृद्धि भए पनि यही बेला वीरगञ्ज नाका भएर पेट्रोलको आयात पनि तेब्बरले वृद्धि भएको हो। नेपालमा अहिले पेट्रोल प्रतिलिटर १७८ रुपैयाँमा बिक्री भइरहेको छ। चालु वर्षको जेठमा पेट्रोलजस्तै वीरगञ्ज भन्सार नाका भएर डिजेलको आयातमा पनि वृद्धि भएको छ। जेठमा वीरगञ्ज नाका भएर १६ अर्ब ८० करोड १७ लाख ६६ हजार बराबरको कुल १ लाख २५ हजार ३ सय ८० किलोलिटर डिजेल आयात भएको छ। जबकि गत आर्थिक वर्षको जेठमा ६ अर्ब ३० करोड ६० लाख ६७ हजार बराबरको जम्मा एक लाख १ सय ४० किलोलिटर डिजेल आयात भएको वीरगञ्ज भन्सार कार्यालयले जारी गरेको तथ्यांकमा उल्लेख छ।

यस आँकडाअनुसार चालु वर्षको जेठमा गत आर्थिक वर्षको भन्दा २५ हजार २ सय ४० किलोलिटर डिजेल बढी नेपालमा आयात भएको हो। नेपालमा अहिले डिजेल महँगो भएर प्रतिलिटर एक सय ६५ रुपैयाँमा बिक्री भइरहेको छ। वीरगञ्ज भन्सार नाकाले उठाउने गरेको कुल राजस्वमा पेट्रोलियम पदार्थ आयातबाट ७५ प्रतिशत राजस्व उठाउने गरेको छ। जसमध्ये सबैभन्दा बढी चालु वर्षको जेठमा डिजेल आयातबाट ३० दशमलव ८० प्रतिशत र पेट्रोल आयातबाट १२ दशमलव ४० प्रतिशत राजस्व उठाएको छ।