वीरगंज । स्थानीय तह निर्वाचनको समीक्षा र आगामी निर्वाचनको तयारीबारे पाँच दलीय गठबन्धनको बृहत् बैठकमा छलफल हुने भएको छ । आइतबार बिहान प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालबीच छलफल भएको थियो ।
बैठकपछि नेकपा एकीकृत समाजवादीका अध्यक्ष नेपालले गठबन्धनलाई थप मजबुद बनाएर अघि बढ्ने समझदारी भएको बताए । आगामी संघ र प्रदेशको निर्वाचनसम्म पनि गठबन्धनलाई निरन्तरता दिने तयारी रहेको उनको भनाइ छ । ‘हामी तीन दलका नेताले आज छलफल गर्यौँ । गठबन्धनलाई जोगाउँदै चुनावको तयारी गर्ने हाम्रो निष्कर्ष छ,’ उनले भने, ‘चुनावको कमी कमजोरी समीक्षा गर्न पाँच दलको बृहत् बैठक राख्ने सहमति भएको छ ।’उनले स्थानीय तह निर्वाचनको तालमेल निकै पेचिलो बनेको बताए । ‘कुनै जिल्लामा गठबन्धनबीच राम्रो तालमेल भएको छ । हामीले गठबन्धनकै कारण महानगरपालिकामा समेत नेतृत्व पाएका छाैँ, ‘ उनले भने, ‘कतिपय ठाउँमा त गठबन्धन दलबीच इमान्दारीपुर्वक तालमेल भएको भए अन्य पार्टीले जित्ने अवस्था नै रहेनछ । हामीले यी कुरामा समीक्षा गर्नुपर्नेछ ।’
अध्यक्ष नेपालले अमेरिकी एसपीपी सम्झौताका कारण तरंगित बातावरणलाई समेत उचित सम्बोधन गर्नुपर्ने बताए । ‘यो विषयले आम जनतालाई तरंगित गरेको छ । तर, प्रधानमन्त्रीजी यो विषयमा अडिग हुनुहुन्छ,’ उनले भने, ‘उहाँले आजै पनि त्यस्तो कुनै पनि सम्झौतामा हस्ताक्षर हुदैन भनेर प्रष्ट कुरा राख्नुभएको छ ।’
