वीरगंज । झापाको कचनकवल गाउँपालिकामा रहेको सर्पदंश उपचार केन्द्रमा एक वर्षमा २४५ जनाको उपचार गरिएको छ । गाउँपालिका स्वास्थ शाखा प्रमुख जागेस्वर प्रसाद यादवका अनुसार २०७८ असार ३ गते बाट संचालनमा आएको सर्पदंश उपचार केन्द्रमा एक वर्षमा ६ जना विषालु सर्पले टोकेका सहित २४५ जनाको उपचार गरिएको हो ।

नेपालकै होचो ठाउँमा अवस्थित कचनकवल गाउँपालिकामा शुरु गरिएको सर्पदंश उपचार केन्द्रमा भद्रपुर नगरपालिका ,बाह्रदशी गाउँपालिका र छिमेकी मुलुक भारतबाट समेत सर्पले टोकेका बिरामी उपचार गर्न आउने गरेको पाइन्छ । प्रमुख यादवका अनुसार ७ वर्ष उमेर समूह देखी ७० वर्ष सम्मका सर्पले टोकेर उपचार गर्न आएको र हालसम्म सफल उपचार गरिएको छ ।

सर्पले टोकेका बिरामीले उपचार गर्दा ३ सय ५० रुपैयाँ देखि ११ सयसम्म शुल्क तिर्नु पर्ने हुन्छ । अन्य सबै खर्च केन्द्रमा निशुल्क गरिँदै आइएको छ । विषालु सर्पले टोकेका बिरामीलाई दिने सुई एन्टि इस्नेक भेनम भने नेपाल सरकारले निशुल्क उपलब्ध गराउँदै आएको छ ।