वीरगंज । अमेरिकी सेनाको नेपाल आवतजावत बाक्लिएको देखिए पनि भित्रभित्रै भारतीय गुप्तचर संस्था ‘रअ’ को गतिवधि पनि कम छैन । नेपालमा विकसित पछिल्लो राजनीतिक घटनाक्रमबारे ब्रिफिङका लागि जेठ २३ गते सोमबार ‘रअ’ का स्टेशन चिफ राघवप्रसाद भट्नागर दिल्ली पुगेका थिए ।

हवाईमार्ग हुँदै दिल्ली गएका उनी २७ गते शुक्रबार स्थलमार्ग हुँदै काठमाडौं भित्रिए । उनी दिल्लीमै रहँदा प्रधानमन्त्रीपत्नी डा.आरजु देउवा र अमेरिकी सेनाका प्यासिफिक कमाण्डर चाल्र्स एन्थोनी फ्लिन पनि त्यहाँ ओर्लिए ।

नागढुङ्गा ट्राफिकको ‘ट्याङ्गो फाइभ सिक्स’ कलसाइनले शुक्रबार दिउँसो ‘टयाङ्गो वन’ कलसाइन भएका उपत्यका ट्राफिक एसएसपी उमेशराज जोशीलाई दिएको सूचनाअनुसार, उत्तर प्रदेशको नम्बर प्लेटवाला अत्याधुनिक गाडीमा भट्नागर आफ्ना केही वरिष्ठ अधिकारीसहित काठमाडौंतिर ओरालो लागेका हुन् । उनीसँगै ३ वटा गाडीमा २ महिला, कपाल फुलेका र नेपाल बसिसकेकासहित ८/९ जना व्यक्ति पनि थिए । ती हायात लगायत अनेक होटल फेरिफेरी बसेर केही चाहिँ सोमबार फर्किए ।