वीरगंज । नेकपा एकीकृत समाजवादीका अध्यक्ष तथा सांसद माधव कुमार नेपालले स्टेट पार्टनरसिप प्रोग्राम (एसपीपी)का विषयमा कन्फ्युजन पैदा भएको बताएका छन् ।
प्रतिनिधि सभा अन्तर्गतको अन्तर्राष्ट्रिय सम्बन्ध समिति बैठकमा उनले कसैको दबाबमा मुलुकको हित विपरित कुनै पनि सम्झौता नगर्न प्रधानमन्त्रीलाई सुझाव दिए । एसपीपीकाबारेमा सुरुदेखि अहिलेसम्म के–के भयो भनेर सरकारले जानकारी दिनुपर्ने उनको माग छ ।
बैठकमा एमाले नेता प्रदीप ज्ञवालीले एसपीपीबारे सेना र रक्षा मन्त्रालयले गरेको प्रक्रियाका बारेमा स्पष्ट पार्नुपर्ने बताए । कांग्रेसकी सचेतक पुष्पा भुसालले प्रधानमन्त्री शेरबहादुर देउवाको अमेरिका भ्रमणलाई सकारात्मक रुपमा लिनुपर्ने भन्दै विदेश नीतिमा टेकेर भ्रमण हुनुपर्नेमा जोड दिइन् ।
