वीरगंज । इंग्ल्यान्डका ब्याट्सम्यान जोए रुटले सबैभन्दा कम उमेरमा टेस्ट खेलमा १० हजार रन पूरा गरे, भारतीय ब्याट्सम्यान सचिन तेन्दुलकरले टेस्ट खेलमा राखेका कीर्तिमानलाई रुटले पछ्यारहेका छन् । भारतीय क्रिकेटर सचिन तेन्दुलकरले टेस्ट तथा एकदिवसीय क्रिकेटमा धेरै रेकर्ड राखेका छन् । सचिनले अन्तर्राष्ट्रिय क्रिकेट त्यागेको एक दशक हुन लागेको छ । मैदानमा सक्रिय रहँदा धेरैजसो क्रिक्टिसहरू भन्थे, ‘सचिनले टेस्ट तथा एकदिवसीय खेलमा राखेका कीर्तिमान भंग हुन असम्भव छ ।’ वास्तवमा त्यसवेला यस्तै देखिएको थियो । सचिनको कीर्तिमान भंग गर्ने आसपासमा कोही पनि थिएनन्, तर अहिले त्यस्तो स्थिति छैन ।

सचिनको कीर्तिमान तोड्ने संकेत विश्व क्रिकेटले पाएको छ । टेस्ट क्रिकेटको कुरा गरौँ भने इंग्ल्यान्डका जोए रुट सचिनकै कीर्तिमान पछ्याइरहेका छन् । रुटले सचिनको नाममा रहेको एउटा रेकर्ड भंग गरेका छन् । रुटले सबैभन्दा कम उमेरमा टेस्ट फर्म्याटमा १० हजार रन पूरा गरेका छन् । उनले ३१ वर्ष एक सय ५७ दिनमा १० हजार रन बनाए । लड्र्स मैदानमा रुटले न्युजिल्यान्डविरुद्ध शतकीय इनिङ्स खेल्दै सचिन र एलेस्टर कुकलाई समेत पछि पारे । सचिनले ३१ वर्ष तीन सय २६ दिनमा टेस्ट खेलमा १० हजार रन पूरा गरेका थिए । रुटले टेस्ट करिअर सन् २०१२ मा गरेका थिए । उनले १० हजार रनको कोसेढुंगा पार गर्न नौ वर्ष एक सय ५६ दिन लगाएका छन् । इंग्ल्यान्डकै कुकले करिअर सुरुवात गरेपछि १० हजार रन छुन १० साल ८७ दिन लगाए ।
यही रफ्तारमा रुट अगाडि बढ्दा सचिनको नाममा टेस्ट क्रिकेटमा रहेको विश्व कीर्तिमान रन पनि तोडिने विश्वास गरिएको छ । सचिनले आफ्नो टेस्ट करिअरमा ५३.७९ औसतमा १५ हजार नौ सय २१ रन बनाएका थिए ।

१० वर्षको करिअरमा रुट नै राम्रो

टेस्ट करिअरको प्रारम्भिक १० वर्षको विश्लेषण गर्दा सचिनको तुलनामा रुट नै निकै अगाडि छन् । १० वर्षभित्र सचिनले ७३ टेस्टमा ५६.७१ को औसतमा पाँच हजार आठ सय ४१ रन बनाए । त्यहीँ नै रुटले सुरुका १० वर्षमा एक सय १८ खेलमा १० हजार १५ रन बटुले । फेरि पछिल्लो पाँच वर्षको तथ्यांकअनुसार रुटले ४७ टेस्टमा पाँच हजार चार सय २१ रन बनाए । रुट अहिले ३१ वर्षका छन् ।

सचिनले ४० वर्षतिर टेस्टबाट सन्न्यास लिएका थिए । रुट जुन गतिमा अगाडि बढिरहेका छन्, केही वर्षभित्र नै सचिनको रेकर्ड तोडिन सक्छ । सचिनले करिअरको अन्तिम नौ वर्षमा ९० टेस्टबाट ६ हजार नौ सय ५७ रन बनाएका थिए । त्यसवेला उनको औसत ५१.५२ थियो । सहजै सात–आठ वर्षसम्म रुटले टेस्ट खेल्न सक्छन् । यो अवस्थामा रुटले सचिनको नाममा रहेको सर्वाधिक व्यक्तिगत रेकर्ड तोड्ने सम्भावना पनि उत्तिकै छ ।

बढी टेस्ट खेल्नेमा इंग्ल्यान्ड

इंग्लिस खेलाडी प्रत्येक वर्ष भारतीयले भन्दा बढी टेस्ट खेल्छन् । यस्तो अवस्थामा रुटसँग सचिनको रेकर्ड तोड्ने धेरै मौका छ । करिअरको सुरुवाती १० वर्षको मूल्यांकन गर्दा सचिनले भन्दा रुटले ४५ बढी टेस्ट खेलेका छन् । यो १० वर्षमा इंग्ल्यान्डले एक सय २६ खेलेको थियो । भारतले पाँच वर्षमा ६६ टेस्ट मात्र खेल्यो । अन्तर्राष्ट्रिय क्रिकेट काउन्सिल (आइसिसी)ले हरेक वर्ष विश्व टेस्ट च्याम्पियनसिपको आयोजना गरिरहेको छ । आइसिसीको यो अवधारणा आउँदा ६–७ वर्षसम्म चलिरह्यो भने रुटले सचिनको नाममा रहेको सर्वाधिक दुई सय टेस्ट खेलसमेत पाखा लगाउनेछन् । साथसाथै व्यक्तिगत तथा शतकको कीर्तिमानसमेत रुटको नाममा आउनेछ । तर, यसका लागि रुटले सबै सिजनमा फर्ममा ब्याटिङ गर्नुपर्छ ।

रुटलाई टेस्ट नै प्यारो

रुटलाई टी–२० र एकदिवसीयभन्दा टेस्ट खेल नै मनपर्छ । वर्षभरि रुट कमै मात्रामा यी दुवै फर्म्याटमा देखा पर्छन् । इन्डियन प्रिमियर लिगबाहेक रुट अन्य विश्व चर्चित टी–२० फ्रेन्चाइज बेस आधारित लिगमा खेल्दैनन् । एक फर्म्याटमा मात्र केन्द्रित हुनु नै रुटको फिटनेस लेभलको राज हो । सचिनले आफ्नो समयमा टेस्ट तथा एकदिवसीय खेलमा उत्तिकै प्रतिस्पर्धा गरेका थिए ।

त्यसवेला भारतीय क्रिकेटको ब्याटिङ आधार नै सचिन थियो । यस कारण नै सचिनले बढी एकदिवसीय तथा टेस्ट खेलमा अवसर पाए । यति मात्र नभएर सचिन नियमितजसो नै आइपिएलमा सहभागी भए । रुटले पछिल्लो पाँच वर्षमा इंग्ल्यान्डबाट केवल एक टेस्ट मात्र गुमाएका थिए ।