वीरगंज । पश्चिमाञ्चल ट्रक व्यवसायी समिति बुटवलका पदाधिकारीहरूले ट्रान्सपोर्टमा तोडफोड र हातपात गरेका छन् । रुपन्देहीको ओम तिया गाउँपालिका–२ पडसरीमा रहेको ढाक्रे ट्रान्सपोर्टमा भाडाको विषयलाई लिएर उनीहरुले तोडफोड गरेका हुन् । उनीहरुले पौडेल ढुवानीका प्रोप्राइटर गोपालबहादुर क्षेत्रीमाथि हातपात समेत गरेको प्रहरीले जनाएको छ ।पश्चिमाञ्चल ट्रक व्यवसायी समितिका वरिष्ठ उपाध्यक्ष प्रताप कार्की, सेक्टर उपाध्यक्ष गणेश घिमिरे लगायतको टोलीले आफ्नो ट्रान्सपोर्टमा तोडफोड गरेको ट्रान्सपोर्टका प्रोप्राइटर रामप्रसाद पन्थीले रातो पाटीलाई जानकारी दिए । तोडफोडबाट सिसा, टेलिफोन, कुर्सी र सामानमा क्षति पुगेको पन्थीले बताए ।

उनले पौडेल ढुवानीका प्रोप्राइटर गोपालबहादुर क्षेत्रीमाथि समेत हातपात भएको उनले बताए । ट्रान्सपोर्टमा तोडफोड र हातपात भएको जिल्ला प्रहरी कार्यालय रुपन्देहीका डिएसपी नवरत्न पौडेलले रातोपाटीलाई बताए । उनले ट्रान्सपोर्टमा तोडफोड भएको भन्दै प्रहरी कार्यालयमा निवेदन प्राप्त भएको समेत जानकारी दिए । उनले भने, ‘उहाँहरुले व्यक्ति नै किटेर निवेदन दिनुभएको छ, हामी अब प्रहरीलाई घटनास्थल पठाउँछौ, अनि अरू प्रक्रिया अगाडि बढ्छ ।

आइतबार मात्रै पश्चिमाञ्चल ट्रक व्यवसायी समिति उद्योग वाणिज्य सङ्घका बीच भैरहवा–काठमाडौँको १० हजार टनको भाडा २८ हजार र वीरगन्ज–काठमाडौँको ३ हजार कम गर्ने सहमति भएको थियो । सोही सहमतिको आधारमा ट्रान्सपोर्टमा २५ हजार दिइएको र त्यसलाई ट्रक समितिले नमानेको बताएको छ । यता पश्चिमाञ्चल ट्रक व्यवसायी समितिका अध्यक्ष यम पाण्डेसँग प्रतिक्रिया लिनका लागि पटक–पटक फोन गर्दा सम्पर्क हुन सकेन ।