वीरगञ्ज, २३ जेठ । नेपाल कम्युनिष्ट पार्टी (एकीकृत समाजवादी) ले अचानक सरकारबाट आफ्नो मन्त्री फिर्ता बोलाएर नयाँ पठाएपछि जनता समाजवादी पार्टीले पनि आफ्नो मन्त्री फिर्ता बोलाउने तयारी गरेको छ । मन्त्रीहरुलाई फिर्ता बोलाएर नयाँलाई अवसर दिने बताउँदै नेकपा एसले आइतबार आफ्नो चार वटा मन्त्रीलाई सरकारबाट फिर्ता बोलाएर नयाँ मन्त्री पठाएको छ । नेकपा एसले मन्त्री फिर्ता बोलाएको भोली पल्ट जसपाले पनि मन्त्री फेरबदल गर्ने चर्चा चलाएको हो ।

जसपाका एकजना नेताका अनुसार पार्टीका अध्यक्ष उपेन्द्र यादवले नयाँ मन्त्री छान्न आन्तरिक तयारी सुरु गरिसकेका छन् । यादवले पार्टीको तर्फबाट सरकारमा सहभागी भएका चार मन्त्रीमध्ये तीनलाई फिर्ता बोलाउने तयारी गरिरहेको उनले बताए । जसपाबाट हाल राजेन्द्र श्रेष्ठ, रेणु यादव, महेन्द्रराय यादव र रामसहाय प्रसाद यादव मन्त्री छन् । सरकारमा पार्टीको तर्फबाट नेतृत्व गरेका महेन्द्रराय यादवबाहेकका मन्त्रीलाई फिर्ता बोलाएर पर्साका सांसद् प्रदीप यादव, प्रमोद साह, इस्तियाक राईलाई सरकारमा पठाउने तयारी भइरहेकाे स्रोतको दावी छ ।

यसअघि एकीकृत समाजवादीले सरकारमा सहभागी मन्त्री फिर्ता बोलाएर नयाँ सिफारिस गरेको थियो । नयाँ मन्त्रीको रुपमा जीवनराम श्रेष्ठलाई संस्कृति, पर्यटन तथा नागरिक उड्डयन, मेटमणी चौधरी सहरी विकास, शेरबहादुर कुँवरलाई श्रम तथा रोजगार मन्त्रीमा पठाउने निर्णय गरिएको छ । स्वास्थ्य तथा जनसंख्या राज्यमन्त्री रहेका भवानी खापुङलाई भने मन्त्रीमा बढुवा गरिएको छ । स्वास्थ्य राज्यमन्त्रीमा हिरा केसीलाई पठाउने निर्णय भएको छ । उनीहरुले आजै शपथ लिने तयारी भइरहेको छ । दलहरुको मन्त्री फेरबदलको तयारीलाई आगामी संघीय निर्वाचन लक्षित रणनीतिको रुपमा हेरिएको छ । यद्दपी नेपाली काँग्रेस र माओवादी केन्द्रले भने हालका मन्त्रीलाई नै संघीय निर्वाचनसम्म कायमै राखिने बताउँदै आएका छन् ।