मोरङ – विराटनगर महानगरपालिकाभित्र खुलेका विभिन्न चिया पसल, रेष्टुरेन्ट तथा सार्वजनिक स्थलमा सुर्तीजन्य पदार्थको सेवन गर्नेहरु बढिरहेको महानगरले जनाएको छ।

मंगलबार महानगरपालिकामा आयोजित सूर्तीजन्य पदार्थरहित दिवस मनाउने क्रममा जनस्वास्थ्य महाशाखाले चियासँगै युवायुवती सूर्तीजन्य पदार्थको सेवनमा अभ्यस्त हुँदै गएको जनाएको हो।

महानगर जनस्वास्थ्य महाशाखाका प्रमुख रमेश कार्कीले महानगरभित्र अनुगमनको पाटोलाई सक्रिय बनाउँदै सुर्तीजन्य पदार्थ सेवनविरुद्ध बृहत् अभियान सञ्चालन गर्नुपर्नेमा जोड दिए। विगतमा प्रदेश सरकार र महानगरले संयुक्त रुपमा सुर्तीजन्य पदार्थ सेवनविरुद्ध अभियान सुरु गरेको भए पनि त्यसले निरन्तरता पाउन नसकेको उनको भनाइ छ।

सरकारी कार्यालय, मठ मन्दिर, अस्पताल, विद्यालयको १ सय मिटर क्षेत्रभित्र सुर्तीजन्य पदार्थ बिक्री तथा सेवन गर्न नपाउने कानुनी प्रावधान भए पनि त्यसको पालना हुन नसकेको महाशाखा प्रमुख कार्कीले बताए।

कार्यक्रममा महानगरकी उपमेयर शिल्पा कार्कीले सुर्तीजन्य पदार्थ नियमन नियन्त्रण ऐन २०६८ लाई प्रभावकारी रुपमा कार्यान्वय गर्नुपर्नेमा जोड दिइन्। उपमेयर कार्कीले सुर्तीजन्य पदार्थ सेवनविरुद्ध बृहत रुपमा सचेतनामूलक प्रचार–प्रसार र अनुगमनलाई तीव्रता दिइने जानकारी दिइन्।

एक सरकारी तथ्यांकअनुसार १५ वर्षदेखि ३९ वर्ष उमेर समूहका मानिसले ध्रुमपान गर्ने गरेका छन्। कार्यक्रममा महानगरपालिकाभित्र कति संख्यामा धुमपान हुने गरेको वा कारोबार हुने गरेको छ भन्ने यकिन तथ्यांक भने नभएको बताइएको छ।

कार्यक्रममा सुर्तीजन्य पदार्थको सेवनका कारण मुलुकमा २३ प्रतिशत मानिसको मृत्यु हुने गरेको तथ्यांक छ।

कार्यक्रममा महानगर क्षेत्रभित्रका सार्वजनिक स्थलहरुमा सुर्तीजन्य र धुम्रपानको प्रयोग बढ्दै गएको हुँदा त्यसलाई नियन्त्रण न्यूनीकरण गर्न महानगरपालिकाले विशेष योजना बनाएर काम गर्नुपर्नेमा जोड दिइएको थियो।