वीरगंज । रोयल च्यालेन्जर्स बैंग्लोरका विकेटकिपर ब्याट्सम्यान दिनेश कार्तिकलाई इन्डियन प्रिमियरलिग (आईपीएल)को आचारसंहिता उल्लंघन गरेको भन्दै कारबाही गरिएको छ । कार्तिक लखनऊ सुपर जाइन्ट्स विरुद्धको एलिमिनेटर खेलमा आचारसंहिता उल्लंघन गरेको आरोपमा दोषी ठहर भएका हुन्। तर, उनको गल्तीबारे आईपीएलले कुनै स्पष्ट जानकारी दिएको छैन ।
आईपीएलले जारी गरेको आधिकारिक विज्ञप्तिमा भनिएको छ, ‘दिनेश कार्तिकलाई आईपीएल आचारसंहिताको धारा २.३ अन्तर्गत लेभल–१ मा दोषी ठहर गरिएको छ। उनले पनि स्वीकार गरिसकेका छन् र यस विषयमा म्याच रेफ्रीको निर्णय नै अन्तिम छ।’
बैंग्लोरका लागि फिनिशरको भूमिकामा उत्कृष्ट प्रदर्शन गरेका कार्तिकले लखनऊविरुद्धको एलिमिनेटर खेलमा पनि महत्त्वपूर्ण इनिङ्स खेलेका थिए । उनले खेलमा २३ बलमा ३७ रन बनाए र अन्तिमसम्म अपराजित रहे। कार्तिकले रजत पाटीदार (१२८*) सँग ४१ बलमा ९२ रनको अटूट साझेदारी गर्दै बैंग्लोरको स्कोर २० ओभरमा ४ विकेट गुमाएर २०७/४ मा पुर्याएका थिए।
