वीरगञ्ज । वीरगञ्ज महानगरपालिकाका नवनिर्वाचित मेयर राजेशमान सिंहले खुसियाली मनाउन बिहीबार रक्तदान कार्यक्रमको आयोजना गरेका छन् ।सिंह जितेको खुसियाली फरक तरिकाले मनाउन र मानवीय कार्य गर्ने सोचका साथ जनता समाजवादी पार्टी नेपाल जिल्ला कार्यसमिति पर्सा र साहिब दरबार सेवा संस्थान वीरगञ्जले रक्तदान कार्यक्रमको आयोजना गरेको हो । यहाँस्थित राणीसती अतिथी सदनमा बिहीबार बिहान ७ बजेदेखि शुरु भएको रक्तदान समाचार तयार पर्दासम्म ५ महिलासहित ७२ जनाले रक्तदान गरेको जसपाका नेता शशिकान्त सर्राफले जानकारी दिए । कार्यक्रम अझै पनि जारी छ, आयोजकहरुले इच्छुक व्यक्तिलाई राणीसती अतिथि सदन पुगेर रक्दान गर्न आग्रह पनि गरेका छन् ।

स्थानीय निर्वाचन र बढ्दो गर्मीका कारण रक्तदान कार्यक्रममा कमी आउँदा केही समय यता वीरगञ्जमा ह्वातै रगतको कमी भएको रक्तसञ्चार केन्द्र वीरगञ्जले जनाएको थियो । रगत अभावमा यहाँका डेढ दर्जन अस्पतालमा भर्ना भएका विरामीहरुको उपचारमा समस्या आउन थालेपछि जसपा र साहिब दरबार संस्थाले रगतको अभावलाई पूर्ति गर्न कार्यक्रम आयोजना गरेको वीरगञ्जका नवनिर्वाचित मेयर राजेशमान सिंहले बताए । रक्तदान कार्यक्रममा सङ्घीय सांसद् प्रदीप यादव, जसपाका महानगर अध्यक्ष इश्वरचन्द्र यादव, युवा नेता सत्यराज घिमिरेलगायत जसपाका अन्य नेताहरुसमेतको उपस्थिति रहेको छ ।