वीरगंज । नेपाली कांग्रेसका महामन्त्री गगन थापाले अब पार्टी आम निर्वाचनको तयारीमा लाग्नुपर्ने बताएका छन् । बुधबार स्थानीय तहमा कांग्रेसका तर्फबाट विजयी जनप्रतिनिधिहरूलाई सम्मान गर्न कांग्रेस भक्तपुरले आयोजना गरेको कार्यक्रममा उनले स्थानीय निर्वाचनमा राम्रो सफलता प्राप्त गरेको भन्दै अब आम निर्वाचनको तयारीमा लाग्नुपर्ने बताएका हुन् ।

उनले कांग्रेसको लोकप्रियता बढेको पुष्टि स्थानीय निर्वाचनले गरेको जिकिर गरे । योपटकको स्थानीय निर्वाचन आम निर्वाचनको झल्को दिने खालको भएको उनले उल्लेख गरे । नेकपा (एमाले)ले यसअघि जिम्मेवारी पाउँदा पनि काम गर्न नसकेकाले अहिलेको परिणाम आएको उनको भनाइ छ ।

महामन्त्री थापाले अब मुलुकमा नयाँ अध्याय सुरु भइसकेको भन्दै कसैको आलोचना नगरी अघि बढ्नुपर्ने बताए । उनले अबको निर्वाचनमा उमेदवार चयनमा पार्टीले विशेष ध्यान दिने पनि बताए । स्थानीय तहमा पार्टीले घोषणा गरेका कार्यक्रमलाई कार्यान्वयन गर्न जनप्रतिनिधिहरू गम्भीरतापूर्वक लाग्नुपर्नेमा उनले जोड दिए ।