बीरगन्ज,११ जेठ । बीरगन्ज महानगगरको मेयर र उपमेयरमा जित हासिल गरेको खुशीयालीमा सत्तारुढ गठबन्धनले आज संयुक्त विजय जुलुश निकाल्ने भएको छ । मङगलवार बेलुकी गठबन्धनका चार दलले विज्ञप्ति जारी गरेर बुधबार संयुक्त रुपमा धन्यवाद ज्ञापन तथा विजय जुलुश निकाल्ने निर्णय भएको जानकारी गराएका हुन् ।

आदर्शनगर रंगशाला परिसरबाट बुधबार (आज) बिहान १० बजे देखि विजय जुलुश निकाल्ने निर्णय भएको विज्ञप्तिमा जनाइएको छ । आदर्शनगरबाट शुरु हुने विजय जुलुशले नगरको परिक्रमा गर्नेछ । विजय जुलुशमा सहभागी भइ दिन गठबन्धनका सबै दलका नेता कार्यकर्ता र समर्थकहरुलाइ अपिल पनि गरिएको छ । यस्तै विज्ञप्ति मार्फत गठबन्धनका दललहरुले प्रतिगमनलाइ परास्त गर्न बीरगन्जवासी फेरि एक पटक सफल भएको जनाएका छन् ।

बीरगन्जको मेयर र उपमेयरमा प्राप्त जित , गठबन्धनको जित मात्र नभइ सम्पूर्ण बीरगन्जवासीको जित भएको भन्दै गठबन्धनका दलहरुले मेयरमा राजेशमान सिंह र उपमेयरमा इम्तियाज आलमलाइ मत दिएर विजयी बनाएकोमा महानगरका सम्पूर्ण मतादातालाइ धन्यवाद ज्ञापन पनि गरेका छन् । गठबन्धनको विज्ञप्तिमा काँग्रेस पर्साका सभापति जनार्दन सिंह क्षेत्री , जसपा पर्साका अध्यक्ष रामनरेश यादव , नेकपा माओवादी केन्द्र पर्साका अध्यक्ष रामदरश कुशवाहा र नेकपा एकिकृत समाजवादी पोलिटब्यूरो सदस्य चिरन्जिवी आचार्यको हस्ताक्षर रहेको थियो ।