वीरगन्ज । वीरगन्ज महानगरपालिकाका निवर्तमान प्रमुख विजयकुमार सरावगीले नवनिर्वाचित प्रमुख राजेशमान सिंहलाई बधाई दिएका छन् । मंगलबार बिहान अन्तिम मत परिणाम सार्वजनिक भएपछि उनले सामाजिक सञ्जाल फेसबुकमार्फत बधाई दिएका हुन् ।

उनले प्रमुखमा निर्वाचित सिंह र उपप्रमुखमा निर्वाचित इम्तियाज आलमसहित सम्पूर्ण वडाध्यक्ष एवं नगर परिषद् सदस्यहरूलाई बधाई तथा शुभकामना दिएका छन् । सरावगीले यसअघि आफ्नो कार्यकालमा तयार पारेका विकासका आधारहरूलाई नयाँ नेतृत्वले थप परिस्कृत र प्रभावकारी बनाउने विश्वास पनि व्यक्त गरेका छन् ।

मतदानमार्फत नेतृत्व परिवर्तन गर्ने वीरगन्जवासीको चाहनालाई उनले सम्मान व्यक्त गरेका छन् । आफू निर्वाचित नभए पनि वीरगन्जको विकासका लागि निरन्तर सहयोग गरिरहने उल्लेख गरेका छन् ।

आफ्नो कार्यकालमा विभिन्न चुनौतीका बाबजुद पनि विकास र सुधार भएको उनको जिकिर छ । कोरोना नियन्त्रणमा वीरगन्जमा देशमै नमुना काम गरेको उनको भनाइ छ ।

वीरगन्जको बृहत्तर विकासको आधार तयार भइसकेको भन्दै नवनिर्वाचित जनप्रतिनिधिले त्यसलाई तीव्र गतिमा अघि बढाउने सरावगीको विश्वास छ ।