बीरगन्ज,१० जेठ । बीरगन्ज महानगरपालिकाको नवनिर्वाचित मेयर राजेशमान सिंहले बीरगन्जबासीको दैनिकीसँग जोडिएका समस्याहरू समाधान गर्नु आफ्नो प्राथमिकता भएको बताएका छन् । मंगलबार बीरगन्ज महानगरपालिकाको मेयरमा निर्वाचित भएपछि सञ्चारकर्मीहरूलाई संक्षिप्त प्रतिक्रिया दिदैँ सिंहले बीरगन्जबासीको दैनिकीमा भएका समस्या समाधान गर्नु आफ्नो पहिलो प्राथमिकता भएको बताए ।
उनले कर, स्वास्थ्य र शिक्षाको विषयमा विज्ञहरूसँग बसेर छलफल गरी आवश्यक काम गर्ने बताए । मेयर सिंहले बीरगन्जमा सरसफाईको चुनौती रहेको उल्लेख गर्दै वर्षात्को समयमा पानी जम्ने समस्या समाधान गरिने पनि बताए ।‘बीरगन्जबासीसँग जोडिएका जुन समस्याहरू छन् । सर्वप्रथम हामी त्यसलाई निदान गर्छौँ, ‘त्यसपछि विभिन्न विज्ञहरूसँग बसेर जसरी हामीले सुरुमा भनेका छौँ, करको विषयमा, स्वास्थ्य, शिक्षाको विषयमा हामी अगाडी बढ्छौँ ।
बीरगन्जको सरसफाइ एउटा चुनौतीको रूपमा छ । बीरगन्जबासीलाई वर्षात्मा पानी जम्ने समस्या छ, यो सबै दैनिकीसँग जोडिएको कुराहरूलाई पहिलो प्राथमिकतामा राखेको छौँ ।’जनता समाजवादी पार्टीका नेता सिंहले सत्तारुढ गठबन्धनको तर्फबाट विजय हासिल गरेका हुन् । नेकपा(एमाले)का तर्फबाट मेयरका उम्मेदवार एंव निवर्तमान मेयर विजय सरावगीलाइ २२ हजार ५ सय ४४ मतको फराकिलो अन्तरले पराजित गर्दै उनी निर्वाचित भएका हुन् ।
