काठमडौं । सरकारले विश्वविद्यालयलाई सरकारको विज्ञ परामर्श संस्थाका रूपमा स्वीकार गरेर अनुसन्धानमा गरेको योगदानका आधारमा अनुदान दिने घोषणा गरेको छ । मंगलबार संघीय संसदका दुवै सदनको संयुक्त बैठकमा सरकारको नीति तथा कार्यक्रम प्रस्तुत गर्दै राष्ट्रपति विद्यादेवी भण्डारीले सरकारी कार्यक्रमका लागि आवश्यक परामर्श सेवा विश्वविद्यालयबाटै लिइने बताएकी हुन् ।

“विश्वविद्यालयको पठ्यक्रमलाई अनुसन्धानमूलक बनाइने छ । सरकारी कार्यक्रमका लागि आवश्यक परामर्श सेवा विश्वविद्यालयबाटै लिइने छ,” राष्ट्रपति भण्डारीले भनेकी छन्, “विश्वविद्यालयको शिक्षण गुणस्तर र अनुसन्धानमा गरेको योगदानका आधारमा विश्वविद्यालयको अनुधान निर्धारण गरिने छ ।”
उनले विश्वविद्यालयलाई ‘सेन्टर अफ एक्सलेन्ट’ का रूपमा विकास गरिने बताइन् । सरकारले विदेशी विद्यार्थीलाई आकर्षिक गर्ने नीति लिँदै मेडिकल कलेजको संख्या बढाउने पनि घोषणा गरेको छ ।

“विदेशी विद्यार्थीलाई नेपालमा आकर्षित गरिने छ । प्रत्येक प्रदेशमा दुईवटा मेडिकल कलेज सञ्चालन गरिने छ,” सरकारको नीति तथा कार्यक्रममा भनिएको छ । नीति तथा कार्यक्रममा नै प्रधानमन्त्री शेरबहादुर देउवाको जिल्ला डडेलधुरामा मेडिकल कलेज स्थापना गरिने उल्लेख छ । “सुदूरपश्चिम विश्वविद्यालयसँगको सहकार्यमा डडेलधुरामा मेडिकल कलेज स्थापना गरिने छ,” सरकारको नीति तथा कार्यक्रमा भनिएको छ ।