बीरगन्ज । स्थानीय तह निर्वाचनअन्तर्गत बीरगन्ज महानगरपालिकामा मत गणना सम्पन्न भएको छ । वैशाख ३० गते निर्वाचन सकेर ३१ गतेदेखि बीरगन्जस्थित नृसिंह माद्यामिक विद्यालयमा जारी मतगणना मंगलबार बिहान सम्पन्न भएको प्रमुख निर्वाचन अधिकृतको कार्यालय बीरगन्जले जनाएको छ ।

बीरगन्जका १ लाख २४ हजार ६४७ मतदातामध्ये कुल खसेको ९३ हजार ७८२ मत गणना गर्दा ४६ हजार २१५ मत ल्याएर पाँच दलीय सत्ता गठबन्धनबाट बीरगन्जको मेयरमा जनता समाजवादी पार्टी नेपाल (जसपा) का राजेशमान सिंह निर्वाचित भएका छन् ।

उनले आफ्ना निकटम प्रतिस्पर्धी निर्वतमान मेयर एवम् नेकपा (एमाले)का विजयकुमार सरावगीभन्दा झन्डै दोब्बर मत ल्याए । सिंह र सरावगीबीच २२ हजार ४४४ मतान्तर रहेको प्रमुख निर्वाचन अधिकृतको कार्यालयले सार्वजनिक गरेको तथ्यांकमा देखिएको छ । सरावगीले २३ हजार ६७१ मत पाएका छन् भने राष्ट्रिय प्रजातन्त्र पार्टी (राप्रपा)का गिरिश गिरीले ३ हजार ३१३ मत ल्याएर तेस्रो भए ।

त्यसैगरी बीरगन्जको उपमेयरमा पाँच दलीय गठबन्धनबाटै नेपाली कांग्रेसका इम्तियाज आलम निर्वाचित भएका छन् । निकटम प्रतिद्वन्द्वी लोकतान्त्रिक समाजवादी पार्टी (लोसपा)का पुरुषोत्तम लाल झा भन्दा तेब्बर मतले विजयी भएका छन् ।

कांग्रेसका इम्तियाज आलमले ३० हजार ७८ मत ल्याएका छन् भने प्रतिद्वन्द्वी लोसपाका झा ९ हजार ५६८ मत ल्याएर आफ्नो जमानत बचाउन सफल भएका छन् । आलमले झालाई २० हजार ५१० मतले पराजित गरेका हुन् ।

मधेस प्रदेशको एक मात्र महानगर बीरगन्जको ३२ वटा वडामध्ये सबैभन्दा धेरै वडा जित्दै जसपा पहिलो पार्टी बनेको छ । जसपाले मेयर र १३ वटा वडामा अध्यक्ष जित्दा नेपाली कांग्रेसले उपमेयर र १० वटा वडा जितेर दोस्रो भएको छ । त्यस्तै एमाले ७ र लोसपाले दुई वडा जित्दै क्रमश: तेस्रो र चौँथो पार्टी बने ।