वीरगञ्ज । पेट्रोलियम पदार्थको मूल्य वृद्धि भएसँगै वीरगञ्जका खुद्रा ढुवानी व्यवसायीहरूले ढुवानी सेवा बन्द गरेका छन् । ढुवानी व्यवसायी संघ वीरगञ्जको मंगलार बसेको बैठकले पेट्रोलियम पदार्थमा भएको मूल्य वृद्धिको प्रत्यक्ष प्रभाव ढुवानी व्यवसायीलाई परेको निष्कर्ष निकालेर ढुवानी सेवा बन्द गर्ने निर्णय गरेको हो ।
संघका उपाध्यक्ष प्रविन कुमार कर्णको अध्यक्षतामा बसेको बैठकले पेट्रोलियम पदार्थमा र ढुवानीका साधनमा अत्यधिक मूल्य अभिवृद्धि भएपनि ढुवानी भाडामा वृद्धि नभएको भन्दै बैठकमा उपस्थित ढुवानी व्यवसायीहरूले दुखेसो पोखेका थिए ।
संघका सचिव नवराज अधिकारले भने, “डिजेलको मूल्य १०४ रुपैयाँ प्रति लिटर हुँदा लागु गरिएकै भाडामा अहिले डिजेल १६४ रुपैयाँ प्रतिलिटर हुँदा पनि बुकिङ गरिरहेका छौँ । अहिले १० टन खुद्रा सामाग्री लिएर काठमाडौं जानुपरेमा २७ हजारको डिजेल नै खर्च हुन्छ । खाना, चालक सहचालकको पारिश्रमिक सबै गरी १० हजार जोड्दा ३७ हजार खर्च भएपनि अहिले ३० हजारभन्दा बढी कसैले दिँदैन ।”
संघ आवद्ध ४६ जना खुद्रा ढुवानी व्यवसायीहरूले खर्चअनुसारको ढुवानी भाडामा पनि समायोजन हुनुपर्ने माग राखेको संघका अध्यक्ष बालकृष्ण पोख्रेलले बताए । उनका अनुसार वीरगञ्जबाट दैनिक कम्तीमा ४० देखि ६० व्यवसायीहरू खुद्रा सामाग्री लिएर पूर्व र पश्चिमका विभिन्न सहरहरूमा जाने गरेका छन् ।