वीरगञ्ज, ९ जेठ । मधेश आन्दोलनकै रापतापका बिच पनि पर्सा जिल्लाका १४ वटा स्थानीय तहमध्ये ३ वटा पालिका जितेको नेकपा माओवादी केन्द्रले यसपटक एउटा पनि हात पार्न सकेन । २०७४ सालमा भएको स्थानीय तहको निर्वाचनमा पर्साको ठोरी, जगरनाथपुर र छिपहरमाई गाउँपालिका जितेको नेकपा माओवादी केन्द्रबाट हालसम्म २ जना वडाअध्यक्ष मात्रै निर्वाचित भएका छन् । गत निर्वाचनमा अध्यक्ष, उपाध्यक्षसँगै ५ मध्ये ४ वडाअध्यक्ष जितेको माओवादी केन्द्रले यसपटक ठोरी गाउँपालिका वडा नम्बर ५ मा मात्रै जित निकालेको छ । गत निर्वाचनमा दोस्रो स्थानमा रहेका अष्टबहादुर लोप्चन यसपटक बिजयी भएका हुन् । त्यस्तै पर्साको बिन्दवासिनी गाउँपालिका वडा नम्बर ५ मा मोहन राउत अहिर निर्वाचित भएका छन् । २०७४ सालमा अध्यक्ष, उपाध्यक्षसँगै ३ वडाअध्यक्ष जितेको माओवादी केन्द्रले छिपहरमाई गाउँपालिकामा एक वडामा पनि जित्न सकेन । गत निर्वाचनमा माओवादी केन्द्रबाटै निर्वाचित पालिका अध्यक्ष मनोज कुमार गुप्ता नेकपा एमालेमा प्रवेश गरेसँगै त्याहाँ माओवादी कमजोर बनेको हो । जगरनाथपुरमा पनि माओवादी केन्द्रले अध्यक्षसहित १ वडाअध्यक्ष जितेको थियो । पालिका अध्यक्षमा जितेका जालिम मियाँ मन्सुरी नै एमालेमा प्रवेश गरेपछि त्याहाँ पनि माओवादी कमजोर बनेको हो । वीरगञ्ज महानगरपालिकाका ३२ वडामध्ये वडा नम्बर २० मा मात्रै जितेको माओवादी केन्द्रले यसपटक पराजय भोग्नुपरेको छ ।

गत निर्वाचनमा माओवादीबाटै बिजयी भएका अधिकांश जनप्रतिनिधि एमालेमा प्रवेश गरेपछि यहाँका जिल्ला नेतृत्वसँगै केन्द्रिय सदस्यहरुले गम्भिर्यताका साथ नलिएको अहिलेको नतिजाले स्पष्ट हुन्छ । पार्टीको आपसी अन्तरविरोधका कारण जित्ने ठाउँ पनि गुमाउनु परेको माओवादी केन्द्रका केन्द्रिय सदस्य बिजय महतोको भनाई छ । चुनाव खर्चिलो भएका कारण पनि माओवादीले खर्च गर्न नसक्ने हुँदा पराजित भएको महतो बताउँछन् । उनले भने, ‘पालिकामा जित्न करोडौ खर्च गर्छन्, वडामै ४०/५० लाख खर्च गरे । अनि हामी जस्ता सर्वहारा वर्गले कसरी जित्नु ?’ प्रतिनिधि सभा सदस्य एवम् पार्टीकी केन्द्रिय सदस्य शेखचाँद ताराले पनि महतोकै कुरामा समर्थन जनाइन् । पुराना नेताकै कमीकमजोरीका कारण पर्सामा माओवादी कमजोर बनेको उनको बुझाई छ । निर्वाचन प्रणालीलाई समानुपातिक बनाउनुपर्ने बताउँदै उनले जनता समाजवादी पार्टी (जसपा) र नेकपा एमालेका उम्मेदवारले पैँसाको खोला बगाउँदा माओवादीका उम्मेदवार पराजित भएको टिप्पणी गरिन् । नेकपा माओवादी केन्द्र पर्साका अध्यक्ष रामदरश कुशवाहाले जिल्लामा पार्टी झनै कमजोर बनेको स्विकार गरे । पुँजीपतीहरुकै हालीमुहालीका बिच गरिब एवम् सर्वहारा वर्गले हार्नु स्वभाविक भएको बताउँदै अध्यक्ष कुशवाहाले पुँजीसँगै पार्टीभित्रको आन्तरिक विवाद पनि पराजयको कारण भएको बताए । उनी भन्छन्, ‘हामी जनताको बिचमा गएपनि एजेण्डा र भिजन लिएर भाषण गर्छाैँ तर अरु पार्टीहरु पैँसाको बिठो बोकेर जान्छन् ।’

पार्टीभित्रकै सांगठनीक संरचना, एकले अर्काको अस्तित्व स्विकार गर्न नसक्ने प्रवृति र अन्तरघातको नतिजा अहिले भोग्नु परेको कुशवाहाको भनाई छ । जिल्ला समितिलाई जिल्लालाई समन्वय समिति बनाएर सम्पुर्ण कार्यकारी अधिकार पालिका समितिलाई दिएको हुँदा हस्तक्षेप गर्न नमिल्ने उनको दुखेसो छ । जनयुद्ध गरेर परिवर्तनको शुभारम्भ गरेको माओवादी पार्टी सर्वहारा वर्गको पार्टी भएको हुँदा पैँसा खर्च गर्नेहरुको अगाडी पराजित भएको माओवादी केन्द्रका युवा नेता सन्तोष पटेलले बताए । ‘जमिन्दार, रंगदार र पुँजीपतिहरुको चलखेलका कारण व्यक्ति, नाता, जात, धर्मका आधारमा मत दिने प्रवृति अँझै हराएको छैन । गरिब, दलितलाई उम्मेदवार नबनाएर आफ्नै नातेदारलाई बनाउँछन् । अनि उनैलाई जिताएर आफैले निर्देश गर्छन्’, पटेलले भने । प्रदेश सभा निर्वाचन क्षेत्र नम्बर ४(ख)माओवादी केन्द्रका संयोजकसमेत रहेका पटेलले माओवादीको भातृ संगठनका केन्द्रिय सदस्य भएर पनि नेकपा एमालेलाई खुलेरै सहयोग गर्ने र आफ्नै पार्टीलाई हराउने खेलमा लागेकाहरुलाई कारवाही गर्नुपर्ने माग गरेका छन् ।