सिरहा । सिरहामा बाबु छोराको धारीलो हतियार प्रहार गरी हत्या भएको छ। घरमै सुतिरहेको अवस्थामा सिरहाको अर्नमा गाउँपािलका १ महनौरका करिव ६० वर्षिय चुलाही भन्ने चन्देश्वर पाल र उनको १९ वर्षिय छोरा सन्त कुमार पालको गएराती हत्या भएको हो । सन्त कुमारको यहि जेष्ठ ११ गते विवाह हुने भएकाले गाउँले महिलाहरु विवाह गीत गाएर करिव १२ बजे सुतेका बाबु छोराको करिव २ बजे राति हत्या भएको स्थानीयले जानकारी दिए। स्थानीयका अनुसार राती करिव १२ बजे सम्म गीत बजि रहेको थियो, विहान पख करिव ३ बजे हत्याको घटना गाउँ भरी फैलिसकेको हुनाले २ बजेको आसपासमा घटना भएको हुनसक्ने अनुमान छ ।
घरको छुट्टाछुट्टै कोठामा बुबा र छोरा सुतेका थिए। उनीहरुलाई सुतिरहेकै ठाउँमा धारीलो हतियार प्रहार गरी हत्या गरेको बताइएको छ। बुवा एकलै सुतेको र सन्त कुमारसँग गाउँकै १०–१२ बर्षको बालक सुतेका थिए। बालकले नै हत्या भएको थाहा पाएपछि घरका अन्य सदस्य र गाउँलेलाई जानकारी गराएका थिए । महनौर बजारमै हार्डवेयर पसलमा काम गर्दै आएका सन्त कुमार इमान्दार र असल छविको युवा रहेको स्थानीयको भनाई छ ।
घटनाको जानकारी पाए लगतै विहान ४ बजे प्रहरी घटनास्थल पुगेर अनुसन्धान थालेका हुन । जिल्ला प्रहरी कार्यालय सिरहाका सूचना अधिकारी डीएसपी सुवास ढकालले घटनाबारे तत्काल केही बताउन नसकिने बताए ।उलने भने, ‘घटना भएको छ, हामीले विभिन्न ढङ्गले अनुसन्धान गरिरहेका छौं, तत्काल घटनाको बारेका केही बताउन सकिन्न।’ प्रहरीले अनुसन्धानका लागि तालिम प्राप्त कुकुरमार्फत घटनास्थलको अनुगमन गरिरहेको छ ।